Gainontzeko atalek datorren asteartera bitartean osatuko dute "Berria" egunkariak ateratako multimedia gunea: bihar, prozesu judizialari eta ondorioei dagozkienak, eta etzi, ikerketa kazetaritzari eta atentatuei dagozkioenak, horien fitxa eta maparekin. Asteartera bitartean eduki gehiagorekin osatuko dira atalak, tartean, gerra zikinarena. Izan ere, hilaren 15ean jendaurreko aurkezpena egingo da Martin Ugalde Kultur Parkean, Andoainen, 19:30ean.
ETAko kideak ziren hildakoetako batzuk, beste arrazoi batzuengatik errefuxiatutakoak beste batzuk, eta politikarekin batere zerikusirik ez zutenak ere izan ziren hildakoen artean. Berriak webgune berezi batean hildako horien soslaiak osatu ditu, ahal izan den kasu guztietan, senide eta lagunekin hitz eginda. Gainera, 1983-1987 kontakizun nagusian gertatutakoa jaso du Eider Goenaga kazetariak. 40 laguneko lan talde batek hartu du parte webgunean, tartean, kazetariak, bideogileak, Berriaren webguneko teknikoen lantaldeak eta euskara taldea.
Xabier Galdeano eta "Tigre"-ren erailketak jaso ditu multimedia gune batean "Berria" egunkariak
Datorren asteazkenean, urriak 16, beteko dira 30 urte GALek Joxean Lasa eta Joxi Zabala bahitu zituenetik. Modu horretan hasi zen 1983tik 1987ra 27 pertsona hil eta beste hainbat zauritu zuen erakundearen ibilbide ankerra. Lau urtean hil zituzten, eta gehiago ere izan zitezkeen, Berria.info agerkari digitalak zabaldu duenez. Euskarazko egunkariak Lasa eta Zabalaren bahiketaren urteurrena baliatuz multimedia gunea jarri du martxan gaur, lehen hiru atalekin: 1983 eta 1987 urteen arteko kontakizuna, errefuxiatuen egoera eta hildakoen soslaiak. Horien artean dira Eugenio Gutierrez Salazar “Tigre” leioztarra eta Xabier Galdeano Arana algortarra. Gutierrez 1984ko otsailaren 25ean erail zuten errefuxiatu talde batekin Zuberoako Idauze-Mendi udalerriko baserri batean zegoela. Euskara ikasketen atsedenaldian baserriaren atarira irten zenean tiro bat jaso zuen eta bertan gelditu zen hilik. Hilketa GALek beregain hartu zuen, baina orain arte inor ez da akusatua izan bere heriotzagatik. Galdeanori dagokionez, 1985eko martxoaren 30ean hil zuten GALen mertzenarioek, tiroz, Donibane Lohitzuneko Urdazuri auzoan, bere etxetik gertu, "Egin" egunkarira manifestazio bati buruzko kronika eta argazkiak bidaltzera zihoala. Galdeano aipatu kazetaren sortzaile, administrazio kontseiluko kide eta kazetaria izan zen. Argazkian, Xabier Galdeano gogoratzeko pankarta aurreko omenaldi batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun