Azken fase hori proiektuaren 4. faseko etapa desberdinekin batera egingo da, hots, estalkiak, fatxadak eta instalakuntzak eraikitzeko eta amaierak egiteko lanekin batera.
Imanol Landa alkateak adierazi duenez, "proiektuaren azken fase honek, laster, eta eraikin alboko kanpoko eremu guztiaren urbanizatzea amaituta, hiritarrei berriro gune publiko bat eskaini ahal izatea bermatuko digu, gune hori erabili eta goza dezaten. San Nikolas plazakoa, historian zehar oso erakargarria izan den esparrua baita, algortarren belaunaldi asko eta askok elkartu eta aisiarako gune gisa erabili dutena, eta halaxe izaten jarraituko duena obra amaitutakoan”.
Joseba Arregi Hirigintza zinegotziak azaldutakoaren arabera, urbanizatze-jarduketari esker, San Nikolas plaza gune handi eta garbia izango da, oinezkoak lehenetsiko ditu, erabilera askotakoa izango da “eta bere ohiko izaera berreskuratuko du”. Urbanizatzearekin San Nikolas plazak eta Getxo Antzokikoak bat egingo dute, maila berean izango dira, lehen zeuden hesi arkitektonikoak kenduz. Elizara sartzea ere errazagoa izango da, Basagoitiko goialdean arrapala kokatuko baita, plataforma berrira doana.
Agertoki handia, zuhaitzez betetakoa
San Nikolas plaza agertoki bezala erabiltzeko beharrezko instalazio guztiak izango dira bertan, behar duen tipologiaren arabera eta antolatuko den jardueraren arabera, egitura finko eta iraunkor baten oztoporik gabe. Plaza erabilera askotakoa izatea gainbalioa da.
Horrez gainera, hura erabiltzeko berreskuratuta, auzoko bizi-kalitatea hobetuko eta merkataritza eta ostalaritza suspertuko dira, inolako zalantzarik gabe.
Bertan egingo diren bestelako jarduketei dagokienez, 54 arbola berri landatuko dira, 6 espezie desberdinetakoak, urbanizatutako eremu osoan zehar kokatuko dituzte, aulki zabalak, bizi-aparkalekuak eta paperontziak izango ditu eta argiztapen sisteman Led teknologia aurreratua erabiliko da, energia-eraginkortasun handia lortuz. Urbanizazio osoan erabiliko diren material guztiak kalitate, erresistentzia eta nobletasun handikoak izango dira, esate baterako, egurra, beira eta altzairu herdoilgaitza, behegaineko granitozko lauza handiekin nahasiko direnak. Hala da ze, "gune paregabea, egungoa eta erabilgarria sortuko da”, Arregiren esanetan.
Bestalde, komun publikoak zaharberritu dira dagoeneko, irisgarriagoak eta erabilgarriagoak dira, lehenago zeudenak askoz ere hobetuta.
Gogoratzekoa da aurtengo hasieratik plazaren zatirik handiena irekita dagoela, aldi baterako eta behin-behinekoz, jendea ibiltzeko, behin betiko urbanizatze lanak hasi bitartean.
Getxoko Udal Gobernu Batzordeak Getxo Antzokiko 5. faseari dagokion proiektua onartu berri du. Azken fase horretan, eraikin berriaren alboko kanpoko eremu guztia, eta batez ere, San Nikolas plaza urbanizatuko dute, 4.000 metro koadroko oinezkoentzako esparru bakarra osatuko dutela. Besteak beste, gune osoa agertoki handia bilakatuko dute eta berrogeita hamar bat zuhaitz landatuko dituzte bertan. Lan horiek Andres Cortina kalean egindakoen jarraipena dira eta zolatze obra egin eta hiri-altzariak, argiteria publiko eta lorategiak ipintzea ekarriko dituzte. Urbanizatuko den eremuak honako tokiak barne bilduko ditu: San Nikolas plaza,elizako ingurune osoa, Basagoiti etorbidea (Aretxondoko elkargunetik elizaraino) eta Getxo Antzokiko eta Musika Eskolako eraikinek osatzen duten konplexuko sarbide eta atzeko zabalgune berria ere. Obraren aurrekontua 3 milioi euro ingurukoa da eta lanak egiteko epea, lizitazio aldia amaituta (6 bat hilabete barru) bi fasetan banatuko da, gainezarri daitezkeenak. Lehenengoan, gune irekiko urbanizatze lanak egingo dituzte 42 astetan, eta bigarrenean, egun eraikinak altxatzeko obragatik hesiekin dagoen esparrua, 21 astetan. Argazkian, Imanol Landa alkatea eta Joseba Arregi Hirigintza zinegotzia / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun