Goizeko 10etan abiatu da Espainiako Auzitegi Nazionalean 26/11 sumarioaren gaineko epaiketako bigarren saioa. Segiko arduradunak izatea leporatuta, guztira 40 gazte epaitzen ari dira; horien artean Xabier de la Maza gorliztarra. Atzo bezala polizien aurrean torturapean deklaratu izana salatu, eta gehienen jarduna publikoa zela defendatu dute gaur epailearen aurrean aurkeztu behar izan duten neska-mutilek, Berria.info agerkari digitalak zabaldu duenez. Izan ere, Madrildik zuzeneko kontakizuna egin dute Oihana Elduaien eta Hodei Iruretagoiena kazetariek. De la Mazari ere gaurkoan heldu zaio txanda, 13:55 inguruan eta hogei minutuz egon da Manuela Fernandez de Prado epailearen aurrean. Gorliztarrak ere bera zein beste pertsona batzuk —poliziak erakutsitako argazkietatik inor ez zuela ezagutzen aipatu du— erruztatzeko jasandako "mehatxuak, irainak eta kolpeak" salatu ditu. Argazkian, atzoko mobilizazioa Gorlizen.
"Dena kontatuko niela esan zidaten. Banekiela zer gertatu zitzaion Jon Anzari", adierazi du gazteak. "Kalera ateraz gero, berriz nire bila joango zirela esan zidaten. Nahiago nuen kartzelara joan", gaineratu duenez. Polizia aurrean sinatutako deklarazioari dagokionez, De la Mazak esan duenez, "idatzita zeukaten, idazteko plantak egin zituen, baina idatzita zegoen, ez nezan aldatu!". Horrenbestez, 15:00ak pasatxo amaitu da gaurko saioa Auzitegi Nazionalean eta bihar jarraituko dute. Gaur 14 gaztek deklaratu dute, atzo 10ek eta lau ez ziren agertu. 12 geratuko dira biharko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun