Astelehenean Naiz.info agerkari digitalak iragarri bezala, Europako Giza Eskubideen Auzitegiak astelehenean, goizeko 11:30ean, ezagutaraziko du 197/2006 doktrinari buruzko epaia. Horixe bera ofizialki baieztatu du gaur Estrasburgoko tribunalak. Auzitegi horretako Areto Nagusiak irailaren 12ean hartu zuen aipatu doktrinaren inguruko erabakia. Bitartean, Espainiako Kongresuko osoko bilkuran hitz egin du Mariano Rajoy Espainiako Gobernuko presidenteak Parot izenez ere ezaguna den doktrinaz, Aitor Esteban EAJko diputatuak galdetuta. Espainiak epai hori beteko duen galdetu dio Estebanek, eta ohartarazi "zuzenbide estatu batek bere arauak bete" behar dituela. Rajoyk, ordea, ez du zehaztu hala egingo duen, Berria.info agerkariak zabaldu duenez. Defendatu du 192/2006 doktrina "oso baliagarria" izan dela "terrorismoaren" aurkako borrokan, eta oroitarazi du Espainiako Auzitegi Gorenak eta Auzitegi Konstituzionalak babestu egin zutela: "Ez du zentzurik 23 pertsona hil dituen batek eta bat hil duenak abantaila berdinak izatea". Europako Giza Eskubideen Auzitegiaren epaia Ines Del Rio preso tafallarraren egoerari buruzkoa izango da, baina 197/2006 doktrina ezarria duten gainontzeko 70 presoei eragin diezaieke zuzenean; tartean Iñaki Gonzalo Casal "Kitxu" itzubaltzetarrari. Argazkian, maiatzaren 4ean Iñaki Gonzalo Casal "Kitxu" preso politiko itzubaltzetarra zen kalera ateratzekoa, 197/2006 doktrina aplikatu aurretik / cc-by Algortako Herrira.
2012ko uztailean, Estrasburgok adierazi zuen Ines del Rio preso politiko tafallarrari 197/2006 doktrina ezarri izana ez zela legezkoa, baina Estatu espainolak erabakiaren aurkako helegitea jarri zuen. Helegite hura martxoan aztertu zuten, eta Areto Nagusiaren behin betiko erabakiaren zain gelditu zen. Orain iragarri dute noiz jakinaraziko duten ebazpena. Rajoyren arabera, auzitegiei dagokie Estrasburgoren epaia aplikatzea. Esan du, baina, "ETAren aurkako borrokan oso baliogarria" izan dela, eta berak ez duela bertan behera uztea nahi. Edonola ere, esan du Espainiako Gobernuak "interes orokorrari" erantzungo diotela "ordenamendu juridikoa eta nazioarteko hitzarmenak" betez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun