Algortako "arrantzaleen" ekimena (cc-by Arrantzaleak Productions)
Algortako "arrantzaleen" oharra
Aste honetan hamarnaka gazte ari dira epaitzen Madrilen euren lan politikoagatik, igandean beste gazte bat bahitu zuten eskeleto maskaradun ezezagunek, eta atzo, sinesgaitza den arren, 6 Euskal Herritar atxilotu zituzten ikurrina bat herriko plazan zintzilikatzeagatik. Eta hau dena egia da.
Francoren garaiko eraso hauen aurrean, orduko denborako bizarrekin erantzutera goaz. Algortako portu zaharretik dei egiten diogu euskal gazteriari sistema desobeditzeko. Izan ere, sistema honek gure nortasun propioa zanpatu, ezabatu nahi du.Eta ez du zalantzarik izango gure aurka edozer medio erabiltzeko. Beraz, gazteri libre eta burujabe bat sortzera bidean, eraiki harresia, bakoitzak bere harri propioa eramanez; morea, gorria zein laranja. Harresi honek ez du pitzadurarik izango, eta ez dira pasako. Zure aldea zein den erabaki, eta argi izan, hemen gaudenok ez dugu utziko inor eraman dezaten. Guk konpromezua hartzen dugu, har ezazu zuk ere!
Gazteria Libre ikusi arte, ez dut kenduko bizarrik...
Pasa den uztailaren 6an, Sanferminetako txupina botatzeko ordua heldu aurretik, bizarrez, txanoz eta kanaberez hornitutako hainbat ezezagunek Iruñeko udaletxeko plazan ikurrin erraldoia eskegi zuten. Estraineko aldiz, txupina atzeratu zen, 18 minutuz, Maia alkateak aginduta. Mandatariak ikurrina begi bistatik desagerrarazi arte ez zien jaiei hasiera eman. Kontuak kontu, "gaizkileak" harrapatzeko hitza eman zuen UPNko politikariak eta herenegun Poliziak sei lagun atxilotu zituen. Atzo, epailearengandik pasatu ostean seiak askatu zituzten, auziperatuta. Halere, aurretik Algortan erantzun ikusgarria eman zieten atxiloketei. Izan ere, bizarrez, txanoz eta kanaberez hornituta, bandera nafarra, ikurrina eta arrano beltza herriko kaleetatik zabaltzeari ekin zioten. Algortako aktibisten arabera, "ikurrina bat herriko plazan zintzilikatzeagatik" atxilotzea "sinesgaitza" baina "egia da". Bizardunek "Francoren garaiko erasotzat" jo dituzte atxiloketa horiek, Luis Goñirena zein Madrilen burutzen ari diren makroepaiketak. Hori dela eta, ekimen xelebre eta ikusgarri baten bidez euskal gazteriari sistema desobeditzeko eta herri harresia sortzeko deia luzatu diote. Argazkian, ekimeneko irudi bat / cc-by Algortako "Arrantzaleak".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun