Makro-epaiketa hauek larriak dira oso, baina ez dira batere serioak. Bide penala darabilte gu guztiok zigortzeko, baina ez dituzte penalizaziorako behar diren baldintzak betetzen. Zer zigortu nahi da, ze ekintza, ze atentatu? Ez dago halakorik. Ideia politikoak, proposamen demokratikoak, alternatiba askatzaileak zigortu nahi dituzte. Euskal Herria askabiderik gabe utzi nahi dute, hain zuzen. Horregatik dihardute modu barregarrian justizia plantak egiten. Aznar, Mayor Oreja eta Garzonek 2002 urrun hartan hasitako lardaskeriari ezin izan diote 11 urtetan gure kontrako ezer gehitu. Nazio Batuen Erakundeak berak esan zien, serio, 2009ko ebazpenean, prozesu hauetako aktibitate politiko guzti-guztiak legitimoak direla eta ezin direla penalizatu.
Orain auziari hasiera publikoa eman eta ez dute inolako froga elementurik. Larri dabiltzala, nola erreakzionatu dute? Saioa amaitzera zihoala, fiskalak bota du albiste-sorpresa: 59 lekuko berri ekarri nahi ditu eta aditu bezala erabili. Nor dira, zer dira? Poliziak dira. Aspalditik ezker abertzalearen aurka jazarpenean ari diren poliziak, orain peritu bihurtu nahi. Gure aurkako zama astunago bihurtu nahian. Hori fundamentua !
Libre nahi badugu, ez jarri eremu latz honetarantz begira.Hobe gurean bake eta askatasun gune zabala antolatzen badugu lehenbailehen. Hori bai izango da Libre!
Karmelo Landa Literatura irakaslea Leioa eta Erandioko campusean eta auziperatuak atzo Libre ekimenaren webgunean argitaratutako artikulua
[© Karmelo Landa - Libre] Susmoa hartu zioten, 2009 urtean, Askabide izeneko elkarteari Bilbon eta, zirt-zart!, berehala sartu zuten 35/02 sumarioaren zaku zabalean. Kexa aurkeztu batean, helegitea hurrengoan, larri elkartekoak, baina epaitegiak erantzunik ere ez. Urteak joan, urteak etorri eta hara non, azkenean, abokatu eta guzti agertu behar izan duten "Audiencia Nacional" honetako areto nagusira, eta hantxe argitu da pastela: prostituten laguntzarako Elkartea da Bilboko Askabide hau, ez herriko taberna. Ikustekoak epaileen aurpegi urduriak eta fiskalaren larritasunak une horretan. Argazkian, gazte mugimenduaren aurkako sumarioan auziperatuek eta Batasuna eta herriko tabernen kontrako auzian akusatu eta kaltetuek atzo Auzitegi Nazionalaren aurrean egindako agerraldia, Karmelo Landa erdian dela / © Libre.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun