Eduardo Torres-Dulce Estatuko fiskalak ere esan du Del Rioren kasuan aske uzteko eskatu izanak "ez duela esan nahi beste kasuetan ere hori egingo duenik". Auzitegi Nazionalera igorri duen txostenean Fiskaltzak ere esan du Giza Eskubideen Auzitegiaren erabakiak ez duela beste aukerarik uzten, eta urratu diren eskubideak bere onera ekartzeko modu bakarra dela Del Rio aske uztea. Estrasburgoren erabakia ofizialki ez zuen arren, Auzitegi Nazionalak Fiskaltzari jakinarazi zion atzo bere iritzia eman zezan. Auzitegi Nazionaleko Zigor Aretoko hamazazpi epailek hartu dute erabakia.
Ostiralean Zigor Aretoko epaileek ohiko bilera egingo dute, eta atzoko erabakiarekin aske geratu behar duten beste presoen kasuak aztertzen hasi beharko dute. Gainera, helegitea Auzitegi Nazionalean aurkeztu zuten bi presoren egora aztertu beharko dute Zigor Aretoko epaileek: Juan Manuel Piriz Portugaleteko presoarena eta Joxepa Ernagarena. Parot doktrina ezartzearen aurka aurkeztu zituzten helegiteak aztertu beharko ditu Auzitegi Nazionalak. Del Rioren kasua eraman duten abokatuek atzo aurreratu zuten doktrinaren eraginez espetxean jarraitzen duten preso guztiak aske uzteko eskatuko dutela datozen egunetan. Gaur bertan Londresko Auzitegi Gorenak Antton Troitiñoren egoera argitu beharko du, 15:00etan. Ekainean estradizioa ukatu zuten, Estrasburgoren erabakiaren zain.
Europako Giza Eskubideen Auzitegiak atzo hartu zuen erabaki historikoaren ondoren, Espainiako Auzitegi Nazionalak gaur goizean egin duen ezohiko bileran Ines del Rio preso politiko tafallarra aske uztea erabaki du. Berria.info agerkari digitalak zabaldu duenez, ordu eta erdi iraun ditu bilerak, eta erabakia aho batez hartu dute. Argudiatu dute erabakiaren aurrean ez dagoela helegitea aurkezterik eta Estrasburgoren epaiak derrigor bete beharrekoak direla Giza Eskubideen Ituna sinatu zuten estatuentzat. Auzitegi Nazionaletik, baina, goizean goiz aurreratu dute gaur Del Rioren kasua soilik aztertuko zutela. Ostiralean Zigor Aretoko epaileek ohiko bilera egingo dute, eta atzoko erabakiarekin aske geratu behar duten beste presoen kasuak aztertzen hasi beharko dute. Guztira, Euskal Preso Politikoen Kolektiboko (EPPK) 56 lagun daude espetxean 197/2006 doktrinarekin espetxealdia luzatuta, tartean Iñaki Gonzalo Casal "Kitxu" itzubaltzetarra. Auzitegi Nazionalak aurreratu du jada kasuz kasu aztertuko duela bakoitzaren egoera, alegia, ez dituela ofizioz aske utziko eta preso bakoitzaren eskaera jaso zain egongo dela. Ines del Rioren senide eta lagunak Teixeiroko (Galizia) espetxean daude goizetik, erabakiaren zain. Kazetari andana bildu da espetxe atarian. Auzitegi Nazionalak bere erabakia espetxera helarazi eta bete beharreko agiriak bete ondoren laster aterako da kalera, Berria.info-ren arabera. Argazkian, Iñaki Gonzalo Casal "Kitxu" preso itzubaltzetarraren aldeko pankarta artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun