Kayak Surf Munduko Txapelketa uztailaren 9a eta 21a bitartean jokatu zen, Australiako Queensland eskualdeko Sunshine Kostan. Bertan, Euskal Herriko 10 arraunlariek taldekako urrezkoan Australia eta Ingalaterrari nagusitzeaz gain, norbanako zortzi domina eskuratu zituzten: urrezko hiru, zilarrezko lau eta brontzezko bat. Horrezkero, euskal taldeak 2007an, Bakion, eta 2011n, Estatu Batuetan, lortutako garaipen nagusiak berretsi zituen. Selekzioa honako kideek osatu zuten: Oscar Martinez eta Txema Carreto (master kategoria), Odei Etxebarria eta Teresa Carranza (junior kategoria), Edu Etxebarria, Julen Arrizabalaga, Urko Otxoa eta Xabi Olano (Open kategoria), hala nola Ainhoa Tolosa eta Garazi Iturralde (emakumezkoak).
Victor Hugo Garrido txirrindulari paraolinpikoari dagokionez, behin baino gehiagotan lehiatu da maila nagusienean eta aurten urrezko domina lortu zuen Kanadako Baie-Comeau herrian burututako Munduko Txapelketan, T2 mailako errepideko proban.
Iñigo Urkullu Araba, Bizkaia eta Gipuzkoako lehendakariak azken denboraldian hainbat garaipen izan duten zenbait euskal kirolari Lehendakaritzan hartu eta zoriondu zuen atzo. Kirolari horiek honakoak dira: kayak surf-eko selekzioko kideak, tartean Oskar Martinez algortarra; Aitor Oroza eta Victor Hugo Garrido txirrindularitza egokitutako kirolariak, Garrido Venezuelakoa izan eta Bilbon bizi arren Erandion maiz ikus daitekeela; Bera Bera eskubaloi taldea eta Real Sociedad belar gaineko hockeyko emakumezkoen taldeak. Lehendakariak adierazi zuenez, aurrera egiteko beharrezkoak dira poza, konfiantza eta energia positiboa, euskal kirolariek dituzten ezaugarriak alegia: "Zuen arrakastak energia eta konfidantza ematen digute egunean eguneko erronkei aurre egiteko". Lehendakariak garaipena lortzeko behar den esfortzua azpimarratu zuen. "Kirolak nekea, borondatea, iraunkortasuna, eta gainditze ahalmena eskatzen du", azaldu zuen Urkulluk. Lehendakaria kirolariei zuzendu zitzaien, balio horiekin jende askorentzat "eredu" direla esanez. Bere aldetik, Victor Hugo Garrido hunkituta agertu zen Gasteizen, hanka bat faltan eta baliabiderik gabe hasi arren, Saiatu Fundazioari esker bere ametsak bete ahal izan dituelako. Halere, kirol egokituan aritzen direnei "hirien erdialdeak irekitzeko" lan egin dezan eskatu zion Urkulluri. Argazkian, Oskar Martinez (eskuinean) atzoko ekitaldian / cc-by Irekia - Eusko Jaurlaritza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun