Historia guztia berridatzi nahi dute, era horretako moduak erabiliz. Gaurko saioan ikusi dugu nola. ETA eta Batasuna gauza bera zirela diote, baina 90eko hamarkadan, hori dioten alderdietako ordezkariek kontrakoa adierazten zuten: HBrekin biltzen zen PP, Mayor Orejaren onespenaz; PSOE ere HBrekin elkartzen zen, buru guztien baimenaz. Orain, aldiz, HB, Euskal Herritarrok eta Batasunaren aurkako akusazioak bi eta hiru epaiketatan ere errepikatu egiten dituzte, pertsona berdinen aurka, aurrekoetan absolbitu akusazioak oraingo honetan berriro eta modu berean aurkeztuz. “Non da seguritate juridikoa hemen? Ez nuen inoiz pentsatu ere egingo, hirugarren aldiz , akusazio bera aurkeztuta epaituko nindutenik, aurreko bietan absolbitua izan ondoren!”, esan du erneguz auzipetu ezagun batek gaur epaileen aurrean.
Ikusteko jaio gara. Euskal rock erradikalaren bultzada; OTANen aurkako kanpaina arrakastatsua, edota Gernika 37/87 gogoangarri hura diseinatzea, gaur Audiencia Nacional honetan, ETAkoa izateko argudio gisa aurkezten dituzte.
Gaur deklaratu duen auzipetu batek zera esan du, duela urte batzuk diskartrosia izeneko gaixotasuna diagnostikatu ziotela, bere askatasuna zeharo mugatzen duena. Amaitu orduko joan gatzaizkio auzi-kideak, galdera hau egitera: ze gaixotasun da okerragoa, diskartrosia ala Audiencia Nacional hau?
Erremediorako errezeta: goazen larunbatean Bilboko kaleak ibiltzera, Libre!
Karmelo Landa Literatura irakaslea Leioa eta Erandioko campusean eta auziperatuak "Berria" egunkarian argitaratutako artikulua.
[© Karmelo Landa - Berria.info] Ausartuko naiz esatera. Zer egingo didate, bada, kartzelaratu? Edonola ere, ez naiz isilduko eta esan esango dut: Audiencia Nacional honetan, Gobernu espainiarra ordezkatzen duen eta gure aurkako akusazioak aurkezten dituen Fiskaltza amarrukerian ari da. Bai, bai, horixe esan dut eta kito! Zergatik diodan hau? Bada, jakinaren gainean ari delako gure aurkako informazio faltsu eta oso larria aurkezten. Frogak ditut. Ez bat, ez bi, hamaika froga zehatz baditut, hamaika kasutan egin duelako kontatuko dudana. Baga, auzipetu baten kasuan idatzi du akusazioak, 1983 urtean ETAko partaide izateagatik zigortu zutela, eta ondorioz ETAko partaide ohi bezala aurkeztu du. Ez da egia, absolbitu egin zutelako. Biga, beste auzipetu bat 1984an zigortu zutela. Faltsua. Higa, hirugarrentxo hori ere Y grekoa taldeko partaide bezala zigortu zutela, eta ez zuten epaitu ere egin. Gehi beste zortzi, 1997an epaitu gintuztenak Mahai Nazionalekoak izanda, ETAko kolaboratzaile izan garela, eta ezin du berau ere egiaz esan, Epaitegi Konstituzionalak bertan behera utzi baitzuen aurreko epaia. Argazkian, gazte mugimenduaren aurkako sumarioan auziperatuek eta Batasuna eta herriko tabernen kontrako auzian akusatu eta kaltetuek hilaren 17an Auzitegi Nazionalaren aurrean egindako agerraldia, Karmelo Landa erdian dela / © Libre.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun