Parot doktrina duten presoen auziez eztabaidatuko du gaur Auzitegi Nazionalak
Goizeko 9:15ean zeukaten jarrita hitzordua gaur Espainiako Auzitegi Nazionaleko magistratuek, Europako Giza Eskubideen Auzitegiak 197/2006 doktrinaz iragan astelehenean emandako ebazpena nola ezarri aztertzeko. Izan ere, ohiko osoko bilkura daukate Zigor Aretoa osatzen duten hamazazpi epaileak, Fernando Grande Marlaskak zuzenduta. Josepa Ernaga askatzeko data aurreratzeko eta Juan Manuel Piriz libre uzteko eskaerak izango dituzte mahai gainean, baina baita doktrina ezarria duten auzi guztiez batera edo banan-banan erabakiko duen ere. "Berria" egunkariaren arabera, 54k aurkeztu dute eskaera, baina epaitegiak esan du 49 jaso dituztela. Argazkian, maiatzaren 4ean Iñaki Gonzalo Casal "Kitxu" preso politiko itzubaltzetarra zen kalera ateratzekoa, 197/2006 doktrina aplikatu aurretik / cc-by Algortako Herrira.
Angel Juanes Auziegi Nazionaleko presidentearen arabera, gaur ez dute "oraingoz ezer" ebatziko, eta hemendik aurrera "zein tramite jarraitzen den" izango dute eztabaidagai. Haren esanetan, Estrasburgoko auzitegiaren epaiak Ines del Rio Prada preso politiko ohiaren egoera aztertu zuen soilik, baina gaineratu du epaia "doktrina" dela eta zigor hori ezarria duten presoekin zer egin erabaki behar dutela. Auzitegi Gorenak eta Konstituzionalak esateko zer duten ere ikusteko dago. Goreneko Zigor Aretoko bigarren salak aurreratu du datozen egunetan bilera bat egingo dutela Estrasburgoren erabakia aztertu eta erabaki bat hartzeko. Gorena izan zen 2006. urtean doktrina sortu zuen auzitegia. Gorenean bost helegite daude.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun