Gipuzkoako Zerain herriko, Irrien Lagunen aterpetxean Euskal Herriko familiei pertsonai ezagunekin egun batzuk pasatzeko eta "gure baloreetan oinarritutako jardueretan parte hartzeko aukera ematen diegu", diote Pirritx, Porrotx eta Marimototsen lagunek. Horretarako, urte sasoi bakoitzean egitarau berezitua proposatzen dute, gurasoei, aitona-amonei eta haurrei, egun batzuk familian elkarrekin eta "era hezitzailean partekatzeko aukera eskainiz".
Irrien lagunak Kirikiño bila eta lehiaketa (© Irrien Lagunak SL)
Azaroaren 9 eta 10ean Irrien Lagunen aterpetxera, Zerainera, joango dira Bapirukeko neska-mutilak. Bertan egingo dituzten bisitak eta jolasak Irrien lagunen pertsonaiek gidatuko dituzte: Largabista, Mari Kalanbre, Martin Bertso... Asteburu-pasa horretan euskaraz bizitzeko aukera izango da eta baita Irrien Lagunekin jolastu eta ondo pasatzeko ere. Sendiko lagunak ere haiekin izango dira. Baina Bapiruketarrak zein Senditarrak izan, izena eman ez dutenek ezin izango dute asteburu horretaz gozatu. Izan ere, 5 eta 7 urte bitarteko umeentzako zein edozein adinetako umedun familientzako asteburu pasa horretan izena emateko azken eguna dute gaur ume zein guraso despistatuenek. Oraindino inskribatu ez diren sendiek 685 732 963 telefonora deitu eta Sendi egitasmoko Landerrekin hitz egin dezakete. Umeak bidali nahi dituztenek, ordea, Bizarra Lepoan Getxo udalerriko euskara elkartearen bulegotik pasa beharko dira, Algortako Martikoena kaleko 16. zenbakian, 2. solairuko 4. bulegotik, alegia. Bertara, bankuak emandako ordainagiria eta Osakidetzako txartelaren fotokopia eraman beharko dituzte. Era berean, bi orrialdeko izen-emate orria bete eta sinatu beharko dute. Bizarra Lepoaneko bazkideek 50 euro ordaindu beharko dute asteburu pasara doan nagusi bakoitzeko eta 40 ume bakoitzeko. Bestelako lagunek, 70 euro nagusiko eta 60 umeko. Azkenik, Getxon gutxieneko errenta jasotzen dutenek 20 euro ordainduko beharko dute. Diru sarrerak Laboral Kutxan egin behar dira, 3035 0108 06 1081032766 kontuan. Argazkian, iazko urtarrilean aurkeztu zuten Zeraingo aterpetxea / © Irrien Lagunak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun