Halloween hitza ingelesezko All Hallows' Evening (Santu Guztien arratsaldea) edo All Hallows' Eve (Santu Guztien bezpera) izenaren kontrakzioa da.. Jatorri irlandarra duen ohitura hori aurretiko beste jai bat du sorburu: Samhain ("Udaren Amaiera", Irlandako gaelikoz) jaialdia, edo iluntasuna ekartzen zuen zelten Urtezahar Eguna, alegia. Urte batetik bestera igarotzeaz gain, Samhain gaua mundu honetatik bestera jauzia emateko aukera zela uste zuten zeltek.
Euskal jaia ere bada
Halere, Halloween jaia Arimen Eguna euskal jaiaren antz-antzekoa da. Kristau egutegiaren Santu Guztien Egunaren aurreko gauean ospatzen da, hilak, martiriak eta santuak gogoan izateko egunetan. Euskal Herrian ere ospakizunak egiten ziren Santu Guztien Egunaren bezperan, eta XX. mende arte berezko ohitura zen kuiak, patatak, erremolatxak edo arbiak hustu eta kandelak jartzea, baserrietan bildu eta gaztaina erreak jatea edo umeak eskean ibiltzea.
Azken urteotan Amerikako Estatu Batuetatik Euskal Herrira hedatutako Halloween festa ospatuko du gaur eskualdean makina bat tabernak eta koadrilak, batez ere nerabeak, iratxoz, kalabazaz, sorginaz edota mamuz jantzita. Gauzak horrela, aukerak nonahi ditu festaren batean parte hartu nahi duenak. Besteak beste, Sopelako Elizpe tabernan, 22:00etatik ospatuko dute mozorrutako lagunei txupitoak eta ospariak doan emango dizkietela; Sopelako Sunset tabernan, gauerdian ekingo diote, Sonora diskotekako Voz Dj-a arituko dela eta mozorrotuta joango denari txupito bana oparituko diotela; Urdulizko Ayoberri sagardotegian kontzertu berezia antolatu dute, Urban eta Amargor taldeekin; Sopelako Bora-Boran ere, Hildakoen Eguna ospatuko dute, mozorrotuko direnei hainbat edari merketu eta txupito bana emango diete, 22:30etik 2:30era; Algortako The Piper's ostatuan, The incredible Edmund Helldelberg & his dead band arituko da, 21:15etik aurrera eta hainbat opari eta mozorro emango dituzte; Plentziako La Kalan, ordea, egun bakarrekin nahiko ez eta gaur 23:00etan hasi eta igandera arte luzatuko dute festa, dekorazio berezia, gominolak, larunbateko "happy hour" eta egunero goizeko 6ak arteko ordutegi berezia amuak bihurtuta; eskualdetik kanpo, Barakaldoko La Cuadra tabernan Algortako Bikoizten taldea arituko da 00:30etik aurrera. Argazkian, gaurko gauerako mozorrotutako koadrila bat / cc-by-nc-sa Odd.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun