Antolatzaileen hitzak:
Militarismo naziaren biktimen omenez 2012an, Alemanian, esku artean duzun lana ezagutu genuenean eta Euskal Herrian kaleratzea proposatu zigutenean, geure buruari galdetu genion ea merezi zuen 36ko gerraren, Condor Legioaren eta Gernikaren suntsipenaren historiari buruzko beste lan bat egitea.
Izan ere, historia honen parte batzuk ezagutzen ditugu, baina oraindik badaude hutsune asko ere. Esate baterako, inork gutxik ezagutzen du militar alemaniarrek indar kolonial espainolari emandako laguntza Rifeko gudaren azken momentuetan.
Hau guztia airetik Bizkaiko herriak suntsitu baino 20 urte lehenago gertatu zen. Urte haietako suntsipenak ez ezik, museo eta omenaldietan orduko kriminalek eta haien ondorengoek historia nola azaltzen duten ere erakutsi nahi dugu. Gaur egun Gernikan, Durangon edo Otxandion gertatu ziren bezalako suntsipenak ari dira gauzatzen munduan, beste kriminal batzuek eraginda.
Argitalpen honen, eta osatzen duen erakusketaren, itzulpena eginez hutsune historiko hauek betetzea izan da gure asmoa. Uste dugu merezi izan duela. Sentitzen dugu azaleko izenburuaren zinismoa (“…Luftwaffe-ren erabateko arrakasta”), baina horrelakoa zen hizkera nazia. Gertatutako guztia ez zen izan, inondik inora, gaur egun “albo kalteak” legez ezagutzen duguna, helburu zehatz baten lorpenaren ondorio baizik.
Lau Haizeetara Gogoan
"Legion Condorrek Gernikan eragindako suntsipena" izenburuko erakusketa aurkeztuko dute gaur, osteguna, Abian Kultur Elkarteko egoitzan. Hitzordua 19:00etan jarri dute Algortako Bidebarri kaleko 2. zenbakiko herriko tabernan. Ordu horretatik aurrera, 20 minutuko dokumentala, erakusketaran azalpena eta bonbardaketa gertutik ezagutu zutenekin solasaldia izango dira Lau Haizetara Gogoan elkarteko lagunen eskutik. Eta ostean, ostegunero bezala, "pintxo potea" egingo dute. Erakusketa Abianeko beheko aretoan ikusgai egongo da azaroaren 17ra arte. Lau Haizeetara Gogoan eta Baskale elkarte kolektiboek sortu eta Gernikako Kultur Etxea, Gernika Batzordea, Durango 1936 Kultur Elkartea eta Sare Antifaxista kolektiboen laguntza izan du mostrak. Argazkian, 2012ko irailaren 28an inauguratu zuten Abian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun