Hamaika egun daramatzate gose greban Sevilla II espetxean dauden hamaika euskal preso politikok, tartean Urtzi Paul Larrea getxoztarra dela, bertako "muturreko bizi-baldintzak" salatzeko. Egoeraren larritasunaz ohartuta, kezka agertu dute haien senideek Info7 irratian egindako elkarrizketan, baita Sevillaz harago Espainian sakabanatuta dauden hainbat euskal preso politiko askok egoera berbera jasaten dutela ohartarazi ere. Zehazki Txus Goikoetxea arrasatearraren bikotekide den Onintza Lopez de Munainek hitz egin du haien izenean. Gose grebaren eraginez apurka-apurka ahuldadea nabaritzen hasiak direla esan du, baina "indartsu" daudela azpimarratu. Atzo Etxerat elkarteak zabaldu zuenez, zenbait presok bost kilotik gora galdu dituzte jada. Hala ere, borrokaldiarekin jarraitzeko konbentzimendu osoa daukate. Sevillako euskal preso politikoek abiatutako borrokaldiak, gainera, babesa jaso du espetxe barruan. Izan ere, kartzela berean diren zenbait preso sozialek ere bat egin dute gose grebarekin. Bateratze horrek, Lopez de Munainek esan duenez, Espetxeetako Zaintza epailearen bisita ekarri du. "Espetxeetako Zaintza epailea doa gaur Sevillara. Uste dugu preso sozialak ere borrokan sartu izanak eragin duela bere etorrera", azaldu du. Argazkian, Urtzi Paul Larrea / cc-by Getxo Presoak.
Sevilla II espetxean bizi duten egoeraren aurrean, besteak beste, Osnyko espetxean, Frantzian, dauden euskal preso politikoek, txandakako baraualdia hasi dute Moron de la Fronterako kideei elkartasuna adierazteko, Etxerat elkarteak jakinarazi duenez. Eta espetxeetatik kanpo ere hainbat ekimen antolatu dira elkartasuna adierazi eta euren borrokaldiaren bat egiteko. Horrela, gutun bidalketa masibo bat abiatu da eta sinadura bilketa ere egingo da. Horrez gain, datozen asteetan autobus martxa bat ere antolatuko da. Bitartean, bihar bi mobilizazio izango dira Algortako Telletxe plazan: bat 13:00etan eta bestea 20:00etan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun