Banden Lehia txapelketa mistoa da, internauten botoak zein epaimahaikideenak baliatzen dituena. Epaimahaia musika arloko adituek osatu dute: Ritxi Aizpuru, Baga-Biga diskoetxeko arduraduna; Last Tour Internationaleko ordezkari bat; Haimar Arejita, Gatibu musika taldekoa; eta Andres Portero musika kazetaria.
Ukan taldearen "Beste behin" kantaren bideoklipa (© Ukan - Koartadak Produkzioak)
Ukan Uribe Kostako musika taldeak V. Banden Lehiako finalean arituko da Bilboko Bilborock aretoan hilaren 29an. Horrela jakinarazi du gaur talde euskaldunen sariketa antolatzen duen Azkue Fundazioak: "On-line botoei esker Iseka Rock zumaiarrak eta Ukan taldea sailkatu dira, 3.472 eta 3.113 puntuekin". Halere, erabakia "zaila" izan dela zabaldu dute eta aurkeztu diren 25 taldeei ahalegina eskertu diete. Ukan eta Iseka Rockekin batera, Eskean Kristö eta Urgatz taldeek joko dute Bilborockeko oholtzan, azken saria eskuratzeko nor baino nor arituko direla. Vendetta talde ezagunak ere kontzertua emango du. Hilaren 29an irabaziko duen taldeak Bilbao BBK Live jaialdian joko du, eta disko bat ekoiztuko diote. Lau finalistek disko oroigarri bat jasoko dute, lauren kantak bilduko dituena. Halere, ez da hilaren 29ra arte itxaron behar izango zazpikote uribekostarra entzuteko. Izan ere, gaur bertan joko dute Algortako Hezetasun auzoko jaietan, 23:00etatik aurrera. Argazkian, Ukan / © Ukan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun