Uribe Kostako bestelako udalerrietan bezala, Berangoko neska-mutilen gehiengoak lonjatan edo tabernatan ematen du astiaren zati handi bat. Inertziaren inertziaz horrek horrela izaten jarraitu ez dezan, Epertikere kultur elkartea sortu berri dute, "Berangoko herria batzeko eta gazteei beste aisialdi aukera bat emateko" xedez. Taldearen antolatzaileek zabaldu dutenez, oraingoz "hainbat ekintza antolatu eta aurrera eramateko asmoa" dute eta, aldi berean, Berangoko beste elkarteek antolatuko dituztenen berri emango dute. Horretarako, berangoztarren guztien parte hartzea eskatu dute, gazte zein ez hain gazte. Izan ere, "esan gabe doa guztion onerako den lan hau burutzeko ezinbestekoa dela Berangoko herritarron eta elkarteon arteko elkarlana eta honetan datzala proiektu honen arrakasta", azaldu dutenez. Ekimenarekin bat egin edo besterik gabe harremanetan jartzeko epertikere[abildua]gmail.com posta elektronikoa zabaldu dute. Era berean, sare sozialetan erantzungo dute. Argazkian, Epertikereren lehen ekimena atzo egin zuten, Gorosti elkarteak antolaturiko perretxiko erakusketan produktu ekologikoz beteriko eskorga zozketatu eta 064 zenbakidun irabazleari eman zioten / © Epertikere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun