Urriaren 28an ekin zioten gose greba mugagabeari Sevilla II espetxean dauden hamaika euskal preso politikok, aipatu kartzelako bizi-baldintzak salatzeko, tartean Urtzi Paul Larrea gatibu getxoztarra. Azkorrikoak, ordea, baraualdia utzi behar izan zuen atzo osasun arazoengatik. Bere senideek azaldu zutenez, "58 kilotan zegoen. 9 kilo galdu eta egun pare bat zeramatzan giltzurrunetan mina zuela. Medikuarekin egon zen atzo eta antibiotikoa eman zioten. Haserre, triste, amorru handiz... gose greba uztea erabaki zuen". Bihar itxialdian jarriko da Urtzi Paul Larrea, borrokaldiarekin jarraituz. Gose greba hasi aurreko astean gripearekin ibili zen preso getxoztarra eta horrek oso makal utzi zuen. Hala ere, gose greba abiatzea erabaki zuen. Argazkian, Urtzi Paul Larrea / cc-by Getxo Presoak.
Urtzi Paul Larrea getxoztarrarekin batera ondoko euskal preso politikoek ekin zioten baraualdiari: Iker Agirre, Gurutz Agirresarobe, Koldo Aparicio, Asier Arzalluz, Juan Mari Etxebarri, Garikoitz Etxeberria, Jesus Goikoetxea, Manuel Gonzalez, Juan Lorenzo eta Roberto Lebrero. Bestalde, Javi Agirre eta Iñaki Arakama presoek arrazoi ezberdinengatik ez zuten gose greba abiatu, baina, bat egin dute borrokaldiarekin, "txapeoa" abiatuz. Sevillako espetxean, orain dela lau urtetik, bizi izan dute "tentsio egoera gogorra", senideek azaldu zutenez. Muturreko bizi-baldintzak jasaten dituzte: "beti isolamenduko moduluan izaten dituzte; ez diete inolako aktibitaterik egiten uzten; patiora irteterakoan metal detektagailutik igaro arazteaz gain, ukimenezko miaketa egiten dizkiete gorputz osotik, noiznahi barrabilak edo zakila ukitzera helduz, tentsio une handiak bizi dituzte; Arkaitz Bellon euskal preso politikoak jipoia jasan zuen; aurrez-aurreko bisitetatik bueltan miaketa integralak (osoki biluztera behartuz) egin izan dizkiete; senideei ere miaketak egin izan dizkiete aurrez-aurrekora edo lokutorietara sartzeko eta honen ondorioz zenbait bisita galdu dituzte; eta abar luze bat".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun