Azken Ikasle Dantzarako sarrerak, eskualdean
Gauzak horrela, oraindik-orain txartelak salgai daude Sopelako Laiak ostatuan, Algortako Abian, Leioako Kurkudi eta Itzubaltzeta / Romoko Branka kultur elkarteetan zein Leioa eta Erandioko campusean. Gainera, Uribe Kostatik aterako diren autobusetan izena ematerik oraindik badago, joan-etorriko bidaiak 7 euro kostatuko duela, bertako IAk iragarri lez.
Azken Ikasle Dantza ikasleen erakundeak antolatuko duen akabuko jaialdi handia da, IAk zabaldu duenez. 25 urteko ibilbidearen errepasoa egingo dute Donostian, bai musikari eta baita ikasle mugimenduak bizitako borrokak eta emandako aurrerapausoak gogora ekartzeari ere dagokienez. IA 1988an sortu zuten Iruñeko Txantrea auzoan egindako kongresuan, Euskal Eskola Nazionala eraikitzea helburu.
Betagarriren kontzertua berezia izango da, antolatzaileen arabera. Izan ere, 1998an Betagarrik sortu zuen "10 urtez ikasle eta abertzale" kantua. Lehenengo Ikasle Egunerako banda egin zuten orduko Dimako jaialdirako. Betagarrirekin batera, baina, urte guzti hauetan Ikasle Abertzaleentzat kantuak sortu dituzten lagun guztiak izango dira IArentzat sortutako kantuak zuzenean jotzen. Dank taldea, Amurriorako Ze Esatek-ek prestatutakoa, Amaiurren "Urtez urte tantaz tanta", Edan-en “Itzartu ikasleria”, 20. urteurreneko Anger-en “Iraultza Haziak”, Arrasaterako Des-Kontrol-ek egindakoa, azken kongresurako On taldearena... denak izango dira Betagarrirekin batera. Baita Doctor Deseoko Francis ere.
Uribe Kostako IAko kide eta partaide ohien agerraldia (© Uribe Kostako IA)
IAren 25. urteurrenerako bideoklipa (© Gose - Mikel Clemente)
Heldu den larunbata, azaroak 16, Azken Ikasle Dantza ekimenaz ospatuko dute ikasle abertzaleek izen bereko erakundearen 25. urteurrena, Donostian. Bertan, arratsaldeko 6etatik aurrera, atzoko eta gaurko ikasleen ekitaldiaz gain, kontzertua izango da Gose, Bad Sound Sistem, Ze Esatek, Betagarri eta Las Tea Party Dj-ak arituko direla. Uribe Kostako zein Euskal Herriko gainontzeko ikasleei 25. urteurreneko jaialdi horretan parte hartzeko deia luzatu zieten herenegun eskualdeko gaurko eta atzoko ikasleek. Uribe Kostako IAko kideek zein izandakoek Sopelako Kurtzio kultur etxean egin zuten agerraldia. Bertan, harro agertu ziren ikasleen erakundeak 1988tik hona egindako lanaz eta bereziki Euskal Eskola Nazionalaren alde jarduteko erabakia hartu zuten 1991tik aurrerakoaz. Era berean, iaz Atarrabian bukatutako VI Kongresu prozesuaren emaitzetan berretsi ziren Ane Izquierdo eta Antxon Rodriguez eledunak: "Euskal Herria hezkuntzatik eraikitze bidean, Euskal Eskola Nazionalaren aldeko proiektu politikoan", alegia. "Eskola euskaldun, ezkertiar eta feminista eraiki behar" dugu "Euskal Herria independente, sozialista eta feminista lortzeko", azaldu zutenez. "Uribe Kostan argi dugu, soilik antolatutako ikasleriak lor ditzake helburu handiak, eta gu gure helburua lortzeko bidea egiten hasi gara, herriz herri eta ikastetxez ikastetxe" azpimarratu zuten IAko kideek. Bestalde, Uribe Kostan etzi, asteazkena, erretiratuko dituzte aurretiazko txartelak. Horiek 13 eurotan eros daitezke, Ilunbeko lehiatiletan baino bost euro merkeago. Argazkian, Sopelako agerraldia / © Uribe Kostako IA.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun