Ekimeneko kartela
Uribe Kostako Eztabaida gune antiautoritarioa, gaur, asteartea, hasiko da bere bosgarren urtea ospatzen, Algortako Villamonte plazako bere lokalean. Kontrainformazio esparruan kokatzen den herri liburudendak Ahoztar Zelaieta Zamakona kazetariaren eskutik abiatuko ditu urteurren jardunaldiak. Zelaieta arratsaldeko 7:30ean mintzatuko da ikerkuntza kazetaritzaz, "Egin" egunkaria eta "Ardi Beltza" aldizkariko ikerkuntza taldeetan izandako eskarmentutik edango duela. Kazetari santutxuarra ahoz aho dabil egunotan "Jovenes burukides bizkainos. Clientelismo y 'fontaneria' en el PNV" argitaratzeagatik. Liburu horretan, Bizkaiko EAJren sendien ustezko praktika irregularrak aztertzen ditu Zelaietak, tartean Alaiki eta Uribe Kostako hainbat enpresaren aferak, UKBERRI.NETek atzo jaso zuenez. Argazkian, Ahoztar Zelaieta / © Txalaparta argitaletxea.
Halere, ekimen guztiak ez dira Algortan burutuko. Larunbaterako, hilak 16, Muñarrikolanda mendira irteera antolatu dute Eztabaidaren kideek. Horretarako, goizeko 9:30ean jarri dute hitzordua Larrabasterrako metro Geltokian. Mendi martxaren helburua Uribe Kostako "Burdin Gerria" in situ ezagutzea da. Datorren astera jauzi eginez, azaroaren 20an, azteazkena, beste hitzaldi bat izango da Eztabaidaren lokalean. 19:30etik aurrera, "El islam politico en la estrategia antiimperialista. Un analisis a los paises arabes" hitzaldia emango du Iñaki Urrestarazu analistak. Azken aurreko ekitaldia ostegunean, hilak 21, egingo dute, Hutsa bikoteak kontzertu akustikoa eskainiko duela Eztabaidan, 19:30etik aurrera. Ordu berean eta ostegun bat beranduago, hilaren 28an, Poliziaren ereduari buruzko hizketaldia izango da, herri liburudendan.
Ekimeneko kartela
Ekimeneko kartela
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun