Sopelako Udalak Bizkaiko Foru Aldundiari behin eta berriz jakinarazi dion bezala, aipatu foru-errepideetan "oinezkoek arrisku handia izaten dute errepidea gurutzatzeko orduan". Azken urtean hainbat gertaera jazo dira, larrienak: BI-634 errepidean gizon bat hil zen auto batek harrapatu ostean, 2012ko irailaren 19an. Bestalde, BI-3124 errepidean gazte bat harrapatu zuen auto batek, eta larri zauritu zuen, urte bereko urriaren 11n.
Udalak ia bi urtez eskatu dio Foru Aldundiari autoen abiadura mugatzeko neurriak har ditzaten, edo bestela, Udalari behintzat baimena ematea aipatu neurriak Udalak hartzeko. Gainera, auzokide ugarik idatzi bat sinatu zuten eta Aldundiari bidali zioten, Karmen elizaren aurrean dagoen zebrabidearen arriskuaz ohartaraziz (bertan izan harrapaketak jazo dira). Hori dela eta, Udalak pasabide goratuak ezartzeko baimena eskatu du, autoek abiadura gutxitzera behartzeko.
Segurtasuna
Horregatik guztiagatik, Sopelako Udalak aipatutako alegazioak aurkeztu ditu eta Aldundiari lanak egiteko baimena ematea eskatzen dio. Eskatutakoa ez onartzekotan, Udalak zer nolako neurriak har daitezkeen zehazteko eskatzen dio, helburua beti ere auzokideen segurtasuna eta mugikortasuna bermatzea izanda. Gai hori, besteak beste, gaur landuko da Larrabasterrako Iberre Institutuan ospatuko den auzo-bileran, 19:00etan, aurrekontu partehartzaileen baitan.
Larrabasterrako errepide arriskutsuetan pasabideak jartzeari uko egin dio Aldundiak
Larrabasterra zeharkatzen duten BI-3124 eta BI-634 foru-errepideetan lau pasabide goratu (azken horretan hiru pasabide goratu) eraikitzeko baimena ematea eskatu zion abuztuaren 28an Sopelako Udalak Bizkaiko Foru Aldundiko Herri-Lan eta Garraiobide Sailari. Urriaren 2an udaletxera sopeloztarrera Jose Luis Bilbao buru duen erakundeak bidalitako idatzi bat heldu zen. Bertan Aldundiak egindako eskaerari uko egiten zion, tokiko iturriek zehaztu dutenez. Horrenbestez, Sopelako Udalak alegazioak aurkeztu dizkio Aldundiak hartutako erabakiari. Tokiko erakundearen arabera, ezinbestekoa da “ahalik eta lasterren errepide horietan ibilgailu eta oinezkoen irisgarritasuna, segurtasuna eta mugikortasuna bermatuko dituzten neurriak hartzea”. Udalak azpimarratzen duen legez, prest agertu da lan horiek egin eta ordaintzeko, errepideen titulartasuna Aldundiarena den arren. Argazkian, Larrabasterrako errepidea / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun