Hartara, webgunearen sustatzaileei "zail" egiten zaie ulertzea itxita dagoen webgune bat ixteko oraingo erabakia, "are gehiago autoan erabaki hori 'Herriraren ETAren aldeko legez kanpoko aktibitatearekin jarraitzea saihesteko helburua' kontuan hartu dela irakurtzen dugunean". "Baina, zapaltzailearen logika ulertu behar da: bere neurriak arbitrarioak izan ohi dira. Ez dira ateaz tronpatu. Eta mezua argia da: gustuko ez duen gaien inguruan informazioa eman dezakeen edozeinen kontra jo dezakete. Zure kontra ere bai. Helburua informazioa isiltzea eta gertatutakoa ezkutatzea da", nabarmendu dute Etengabekoek. Ildo horretan ere kokatu dituzte "Egin", Egin Irratia, "Euskaldunon Egunkaria", "Ardi Beltza" "Kale Gorria", Askatu.org, Apurtu.org, Gaztesarea.info, Ernai.info, Burlataherria.org, Herriraren medio digital guztiak eta Ateak Irekiren itxierak.
Auto horren berri Internet bidez jakin eta bere edukia Interneten bidez ezagutu dutela adierazi dute Etengabekoek.
Eloy Velasco Auzitegi Nazionaleko epaileak plazaratutako autoa (pdf)
Ateak Ireki webgunearen itxiera agintzeko autoaren xehetasunen berri eman dute gaurkoan albiste agentzia espainolek. Horretaz gain, komunikabide horren Facebook eta Twitter kontuak, egindezagunbideadonostia.com, zarauzkoherrira.wordpress.com eta, harrigarriena dena, Uribe Kosta eskualdeko errepresaliatu politikoen albisteak ematen zituen Etengabe webgunea ixtea agindu du Eloy Velasco Espainiako Auzitegi Nazionaleko epaileak. Horren sustatzaile izandakoek gaur adierazi bezala, Etengabe "2012ko maiatzetik hona itxita" dago. Harrez gero, bi sarrera ditu, bata 2013ko martxoan, Anjel Figueroa etxean preso zeukaten algortarraren heriotza jasotzen duena eta, azkena, 2012ko apirilean, EPPKren 2012ko adierazpena. Azken hori, webgunearen sarrera modura jarrita dago. "Etengabe ixtea erabaki genuen Herrira sortu eta bere baliabide komunikatiboak martxan jarri zituenean Etengabek betetzen zuen funtzioa beteta ikusten genuelako. Halabaina, Etengabe sarean mantentzea erabaki genuen, bertako informazioa sarean egoteko, urte hauetako artxibo modura", azaldu dutenez. Argazkian, euskal preso politikoen aldarria Algortan, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun