Udalak herritarrei gogoratu die, behar izatekotan, Udaltzaingora dei dezaketela, 944 660 202 telefono zenbakira, edo SOS Deien 112 zenbakira. Halaber, Eusko Jaurlaritzako Larrialdiei Aurre Egiteko eta Meteorologia Zuzendaritzak euri-jasen arriskuaren aurrean egindako gomendioak aintzat hartzea eskatzen zaie herritarrei. Honako hauek dira gomendioak:
- Ez utzi ibilgailurik ez eta kanpin egin ibilgu lehorretan edo ibaien ertzetan. Gerta liteke urak bat-batean gora edo gainezka egitea.
- Kendu ibilgailuak ur-putzuak sor daitezkeen inguruetatik eta urpetu daitezkeen garajeetatik.
- Ahal baduzu, ez hartu autoa.
- Bidaiatu beharra baduzu, ahal duzula, ibili errepide nagusi eta autobideetatik, eta ikusi ezinik bazabiltza, gelditu leku segururen batean.
- Erretiratu urak eramateko moduko gauza guztiak, batez ere, kutsadura eragin dezaketen produktu arriskutsuak.
- Begiratu inguruko hustubideak ondo dauden.
- Urrundu erreka, uhar, zubi edo urpean gera daitezkeen lekuetatik, eta ez saiatu urak hartutako lekuetatik pasatzen, ez autoz ez oinez: urak indar handia dauka eta eraman egin zaitzake. Ura dela-eta autoa errepidean ez aurrera ez atzera geratzen bazaizu, itzali argiak eta irten autotik.
- Mendi-magaletatik eta muino-magaletatik urrun egon; ura, harriak eta lohia amil daitezke-eta.
- Ura etxebizitzara sartuko balitz, alde soto eta behe-solairuetatik.
- Etxea utzi beharra badaukazu, itzali argindarra eta itxi gasa eta ura. Gainera, utzi ohar bat ostatua non hartuko duzun adierazteko.
- Jo leku altuenetara; saihestu urpean gera daitezkeen lekuak.
- Jakinaren gainean egon beti, irratiz edo bestela, jakiteko egoera zertan den eta eguraldiaren iragarpenak zer dioen.
Imanol Landa Getxoko alkateak Udal Larrialdi Plana indarrean jarri du, 0 fasean, Eusko Jaurlaritzako Meteorologia eta Larrialdietarako Arreta Zuzendaritzak osteguneko 00:00etarako euriagatik iragarritako alerta laranjaren aurrean. Getxoko Udalak eskura dituen baliabide guztiak jarriko ditu indarrean, sor daitezkeen arazoei aurre egiteko asmoz. Hori guztia Segurtasun Sailarekin koordinatuta. Eguraldi iragarpenak aztertu ostean, larrialdien aurrean hartu beharreko neurriak berrikusi dituzte tokiko arduradunek. Horretaz gain, Gobela ibaiko toki arriskutsuak aztertu eta Larranazubi aldeko etxebizitza zein baserrietako bizilagunak informatu dituzte, badaezpada. Baina, behaketaz horretaz gain, gizataldea (saneamendua, garbiketa...) eta material teknikoaren (traktoreak, kamioiak, lur-zakuak, xukatzeko ponpak...) koordinazioa egin dute; eta hainbat enpresa pribaturen laguntza dauka Udalak, behar izatekotan berehala ekiteko. Azkenik, udalerriko ostatuekin jarri dira kontaktuan, etxebizitza kaltetutako lagunik hartu behar izatekotan. Argazkian, Fadurako zubia urtarril erdialdeko euriteetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun