Antzerkiak txanda hartuko du ostiralean, Berango Antzokian, 19:00etan. “Tipos de tipas” antzezlanean, Lalulu konpainiak dozena erdiko “sketche"-tan publikoari barrea eragingo dion pertsonaia taldea aurkeztuko du. Ikuskizun dibertigarri horretan, ikusleak dituen antzerki saio baten entsegu orokorrean parte hartzen duten hiru aktoresa erakusten dira: Maribel Salas ETB2ko “Vaya Semanita” programagatik ezaguna, Genma Martínez eta Sol Maguna.
Hegan egiteari beldurra dioten bi azafata, Jainkoaren hitza irrrigarri jartzen duen emakume sinesgogor bat, eta bonba bat desaktibatu behar duten Iparramerikako hiru soldadu aurkeztuko dituzte, besteak beste. Proposatutako pertsonaien taldeak, bere bezeroarekin ados jarritako pitonisa lotsagabe bat, litxarreria dendekin fantasiak dituen emakume bat eta itxuraz gozoak eta kastuak, baina bizio ugarien menpekoak eta bizitza onaren zaleak diren hiru artzain-neskekin dantza bat, eskaintzen du.
Kontzentrazioak
Azaroaren 24an Uribe Kostako Mankomunitateko ekitaldi zentrala burutuko da, Plentzian, 13:00etan, eta 18:00etan txotxongiloen ikuskizuna egongo da Berango Antzokian. “Garaiz ikasi” familia osoarentako muntaia da. Horretan, baterako hezkuntza landuko da hiru istorio ezberdinen bidez: batean, mutilekin futbolera jolasten saiatzen den neska bat aurkezten da, hasieran baztertuta izaten dena, baloiarekin duen trebetasuna erakusten duen arte; bestean, etxeko lanak nola banatzen diren erakusten da; eta, azkenik, Amaiaren istorioa, zorgin baten laguntzarekin dragoi beldurgarri bat garaitzen lortzen duena.
Programatutako egutegia azaroaren 25ean itxiko da, Sabino Arana kalean, Berangoko metro geltokiaren ondoan egingo den kontzentrazioarekin (12:00etan), Emakumeenganako Indarkeriaren Kontrako Nazioarteko Eguna dela eta. Antolatutako aktibitate guztien sarrera doakoa da.
Azaroan zehar emakumeenganako indarkeriaren kontrako ekimenak egiten dabiltza Berangon. Udalaren Berdintasun Sailak antolatuta, bihar, hilak 21, zazpigarren artearen txanda helduko da, zineforum saio batekin. 18:30ean, kalitate handiko film laburren bilduma proiektatuko dute, Berangoetako kultur etxean, emakumeari eragiten dioten arazo ugarietako batzuk ikertzera zuzenduta egongo dena; hala nola, tratu-txarrak, marjinalitatea, presio soziokulturala, desberdintasuna, sexuaren garapenaren eragozpena edo behartutako prostituzioa. "XXI. mendean emakumearen aurrerapena oztopatzen duten indarkeriaren modu ezberdinak dira. Ali, Fatine, Helen, Irene eta Rae Belgikan, Brasilen, Estatu Batuetan, Frantzian eta Erresuma Batuan egindako eta oso sarituak izan diren bost lan hauen protagonistak dira", azaldu dute udal iturriek. Argazkian, 2009ko urtarrilaren 24an ezker abertzaleak deituta bortxaketa bat salatzeko Berangon egin zuten elkarretaratzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun