Gaur eta bihar tenperaturak behera egingo du (5-10 graduko maximoekin), era elur-maila 600-700 metroan kokatuko da. Tarteka, 500 metrora ere jaitsi daiteke. Larunbaterako, berriz, 700-900 metroan egongo da maila hori. Argibide gehiagorako, kontsultatu UKBERRI.NETeko eguraldi zerbitzua.
Areetako ezbeharraren bideoa (© EITB)
Eurite gogorrak zirela eta, Eusko Jaurlaritzaren Segurtasun Sailak atzorako eta gaur goizalderako indarrean jarri zuen alerta laranja bertan behera utzi du gaur goizeko 6etan. Era berean, Estefania Beltran de Heredia Segurtasun sailburuak, egungo ibaien egoera eta euriari dagokion iragarpena kontuan hartuta, uholde planaren larrialdi aurreko fasea desaktibatu du. Izan ere, Euskalmeten arabera, 60 litro pilatu daitezke lehen orduetan, baina egunak aurrera egin ahala gutxiago botako du eta, beraz, arrisku maila jaitsi egingo da. Atzo ere, espero ziren baino arazo gutxiago sortu zituzten euriteek eskualdean. Halere, horrek ez du esan nahi suhiltzaileek eta Babes Zibileko beharginek lanik izan ez zutenik, Urduliz, Berango eta Getxo udalerrietan, batez ere. Esate baterako, Areetako Negubide kalean, Gobela metro geltokitik gertu, zuhaitz bat behera etorri zen, auto bat zapaldu eta errepidea zein espaloia moztu zituela. Getxoko Larrañazubi auzoan, berriz, Gobela ibaiak maila horia erdietsi zuen goizean baina eguerdirako behera egiten hasi zen. Berangon, erreka bat ubidetik atera zen Eroski eta Kurtze parean eta ur-putzu handiak sortu ziren. Urdulizen, berriz, Butroe ibaiak Zabalbidea inguruan gainezka egin zuen, Segurtasun Sailak zabaldu zuenez. Halere, eskualde osoan ez zen zauriturik izan. Argazkian, hainbat lagun Zubilletan, Gobela ibaiari begira, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun