Getxo udalerriko gainontzeko eragile eta norbanakoak aipatu mozioari atxikimendua ematera deitu ditu Algortako Etxeratek, horretarako algortatantaztanta[abildua]gmail.com helbide elektronikoa baliatuz. Baita mobilizazioetan parte hartzera ere.
Kontzentazioa, manifestazioa eta agerraldia
Urtzi Paul Larrea getxoztarra eta Sevilla II espetxeko gainontzeko euskal preso politikoen egoera salatzeko asmoz, iluntzeko 8etan zeukaten jarrita hitzordua Algortako Telletxe plazan. Ordu erdiz bertan kontzentrazioa egin ostean, manifestazioan abiatu dira oiinezkoentzako kaleetatik Txiki-Otaegi plazara. Bertan agerraldi jendetsua egin dute Etxeratek aurkeztutako mozioari babesa eman dioten eragileak ezagutzera emanez eta aipatu idatzia irakurriz.
Urtzi Paul Larrea eta Sevilla IIko preso politikoen aldeko mozioa (pdf)
Getxo udalerriko eragile ugarik babestu dituzte Sevilla II-ko presoen aldarrikapenak
Sevilla II espetxeko euskal preso politikoen gainontzeko herrietan bezala, Getxoko Udalean ere mozioa aurkeztu du Etxerat elkarteak, asteartean, azaroak 26, izango den ohiko osoko bilkurari begira. Izan ere, beraien bizi-baldintzak salatzeko asmoz, gaur 26 egun bete dituzte borrokaldian Moron de la Fronterako gatibuek: zortzik gose greba mugagabean eta beste lauk itxialdian jarraitzen dute, bik osasun egoerarengatik baraualdia utzi behar izan ostean. Azken horien artean da Urtzi Paul Larrea getxoztarra. Etxeraten deialdiari erantzunez, esparru ezberdinetako eragileek bat egin dute mozioarekin: Abian Kultur Elkartea, Algortako Bilgune Feminista, Algortako Ernai, Algortako Gazte Asanblada, BrankaKultur Elkartea, Eztabaida Gune Antiautoritorioa, Getxoko Alternatiba, Getxoko Aralar, Getxoko EH Bildu, Getxoko Eusko Alkartasuna, Getxoko Sortu, Ikasle Abertzaleak, Itzubaltzeta gaztetxea, Itzubaltzetako Emakumeen Asanblada, Itzubaltzetako Ernai, Itzubaltzetako Herri Bilgunea, LAB, Libre Getxon, Tantaz Tanta Algorta, Txorimalo gaztetxea eta Ukberri.net Uribe Kostako eta Erandioko agerkari digitala. Horrekin batera, astearteko udal batzarrera (17:00etan) joatera deitu dituzte kolektiboak eta herritarrak. Gainera, datorren asteko deialdiak babestu ere egin dituzte horiek guztiek: astelehenetik ostegunera, 20:00etan jarri dute hitzordua, Algorta Etorbidea eta Telletxe arteko bidegurutzean. Hileko azken ostiraleko elkarretaratzean, berriz, Sevilla II espetxeko egoera salatuko dute Algortan, 20:00etan, Telletxe plazan. Argazkian, 145 lagunek eta 21 eragilek egin dute mobilizazioa gaur Algortan / cc-by Tantaz Tanta Algorta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun