Gorka Ovejero Arruazuko alkateordea eta Mugitu! elkarteko Mikel Alvarez, Julio Martin eta Ibon Garcia joan den astelehenean epaitu zituzten Espainiako Auzitegi Nazionalean, 2011n Okzitaniako Tolosan Yolanda Barcina Nafarroako presidenteari tartak botatzeagatik. Bost eta sei urte arteko espetxe zigorrak eskatu ditu haientzat Fiskaltzak eta akusazio partikularrak, "autoritatearen kontrako atentatua" leporatuta. AHTren inposizioaren aurkako ekintza izan zen, Pirinioetako Lan Elkartearen bileretako batean egin zutena. Hori salatzeko, ostegun honetan, azaroak 28, hitzaldia emango dute Sopelan "tartalariek", Mugiko elkartearen eskutik. Hitzordua 19:00etan jarri dute, Sekeko gaztetxean (Olabide, 5). Solasaldian Barcinari tarta jaurtitzeagatik auziperatuen egoera azalduko dute, baita AHTren gaur egungo egoera ere. Argazkian, "tartalariak" Frantziako kontsulatuan, Bilbon / cc-by-nc Ateak Ireki.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun