Fiskaltzaren oniritzia dutela, Auzitegi Nazionalak aste honetan aska ditzakeen beste presoak honakoak dira: Bigarren Atalean, Jon Ander Urkizu, Iñaki Orotegi, Nicolas Francisco, Iñaki Erro, Iñigo Akaiturri, Jabier Martinez, Inma Pacho, Santos Berganza, Iñaki Fernandez de Larrinoa eta Jose Angel Biguri eta Gotzone Lopez de Luzuriaga preso gaixoak; Hirugarren Atalean, Kepa Solana, Juan Ignacio Delgado, Jesus Mari Mendinueta eta Bautista Barandalla osasun azaroak direla eta etxean preso dagoena. Atal horretan, Ismael Miquel Gutierrez GALeko kidea ere askatzea aztertuko dute. Hirugarren graduan dago 2002tik aurrera.
Fabio Moreno
Auzitegi nazionalaren Bigarren Atalak deliberatuko dituen espedienteen artean Jabier Martinez Izagirrerena dago. Usansoloko presoa Fabio Moreno Asla bi urteko ume erandioztarraren heriotzagatik kondenatu zuten. Atentatua 1991ko azaroaren 7an gertatu zen, arratsaldeko 4:45ean. Orduan, Antonio Moreno Chica guardia zibilaren auto pribatuak eztanda egin zuen ustez Jabier Martinez Izagirrek eta Juan Carlos Iglesias Chouzasek beheko aldean jarritako lehergailua detonatu zenean. Leherketaren eraginez, autoan zihoan Fabio umea unean bertan hil zen eta Alexander bere bikiak hainbat erredura pairatu zituen, bere aitak bezala.
OHARRA: Andoni Muñoz de Vivar Berrio preso urduliztarra ez dute aske utziko aste honetan zehar, UKBERRI.NETek bart iragarritakoaren kontra. Muñoz Gabon egunean, abenduak 25, geldituko da libre, ezarritako espetxe zigor osoa beteta. Izan ere, atzo Espainiako Auzitegi Nazionalaren Hirugarren Atalak bere kasua aztertuko zuela zabaldu zuten albiste agentziek, 197/2006 edo Parot doktrina ezarria duten beste 25 presoekin gertatu bezala. Auzitegi Nazionaleko Fiskaltzak berak egin zuen errakuntza, atzo Andoni Muñoz de Vivar Berrioren askatasun txostena aurkeztean, preso urduliztarrari doktrina aplikatu ez baitzioten eta, beraz, horren helegitea jarri ez zuenean. Europako Giza Eskubideen Auzitegiak Ines del Rioren auziaz ebatzitakoak ez dio, hortaz, eragiten.
Andoni Muñoz de Vivar Berrio preso urduliztarraren egoera mahai gainean dauka Espainiako Auzitegi Nazionalaren Hirugarren Atalak. Albiste agentziek zabaldu dutenez, Europako Giza Eskubideen Auzitegiak 197/2006 edo Parot doktrina deritzotenaren atzerako eragina bertan behera utzi izanaren ondorioz, beste 26 presoren askatasunaz arituko dira epaileak aste honetan. Horietako 16 euskal presoak dira eta beste bat GALekoa. Muñozen kasuan, Fiskaltzak dagoeneko askatasun aldeko txostena eman du. Urduliztarra 2009ko abenduan utzi zuen Euskal Preso Politikoen Kolektiboa eta "Langraizko bidean" kokatu zuen bere burua. Egun, hirugarren graduan dago eta Leioako udalerrian bizi arren, Basauriko espetxean lo egin behar du. Muñozek Andoni Muñozek 46 urte ditu 1994ko urriaren 25ean atxilotu zuten, Areetako Bizkaiko Zubiko plazan, Itzubaltzeta / Romoko Iñaki Gonzalo Casal "Kitxu", Algortako Iñigo Otazua Urresti "Oti" eta Angel Figueroa Fernandez zenarekin batera. Sabotajeak egin zituen Lanbroa komandoko kideak izatea leporatu zieten lauei, 30 urteko zigorra ezarriz. Handik aurrera, urduliztarrak Carabanchel, Alcala-Meco, El Dueso, Basauri eta Langraiz espetxeak ezagutu ditu, haietako batzuk hainbat bider, gainera. Tartean, atxilotu eta sei hilabetera, udal hauteskundeetara aurkeztu zen, Urdulizko Herri Batasunaren bigarren zerrendakide gisa. Zinegotzi aukeratu zuten. 2009ko ekainaren 22an bere aita hil zen, baina presoak ezin izan zuen aurretik ikusi. Argazkian, 197/2006 doktrinaren aurkako mobilizazio bat eskualdean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun