Gaur, azaroak 26, Bizkaiko zein Araba eta Gipuzkoako metalgintzako langileek lanegun osoan herrialdeko metalgintzako lan hitzarmenaren aldeko pegatina jantzi dute. LAB sindikatuak zabaldu duenez, laneko arropan itsatsitako aldarriak FVEM Bizkaiko metalgintza enpresarien erakundearen jarrera salatu du. Elkarte horren zein SEA eta ADEGIren asmoa, LABen iritziz, "sektoreko lan baldintzak ahalik eta gehien desarautzea da, gizarte osoaren onura baino, euren interes elitistak lehenetsiz". Ekimenean, sindikatu guztietako milaka langilek, baita hitzarmena daukaten enpresetako langileek ere, bat egin dute eta hori "oso positibotzat" jo du ezker abertzaleko zentral sindikalak. Hurrengo egunotarako mobilizazioak iragarri du LABek, eta langile guztiak deitu ditu, "eduki duinak bilduko dituen eta enpresarien gehiegikeriak mugatuko dituzten klausulak jasoko duen sektoreko eta enpresako negoziazio kolektiboa babestearren, antolatuko diren mobilizazioetan parte hartzera". Argazkian, Uribe Kostan, pasa den urtarrilaren 22an abiatu zituzten mobilizazioak / cc-by-sa Eskumaldeko LAB sindikatua.
Bide horretan, "patronalak egungo metalgintzako hitzarmena bete dezan ez ezik, beste berria negoziatzeari ekin diezaion ere" lanean jarraitzeko hitza eman du LABek: "inoiz baino beharrezkoagoa da langile guztien bizi-baldintza duinak bermatuko duen sektoreko hitzarmena izatea. Eskubiderik gabe ez dago kalitateko industriarik, ez eta etorkizunik ere", azaldu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun