Eztabaidaren erdian, udal batzar aretoa utzi du minduta Aitor Cotano Sinde preso politiko algortarraren amak. Izan ere, batetik Etxerat elkartearen ordezkaritza maila zalantzan jarri du Agustin Ruiz Getxoko PSE-EEko zinegotziak: "Benetan nor ordezkatzen du Etxeratek? Euskal preso guztiak? ETAren ildo gogorrekoak? Langraiz Bidea defendatzen dutenak?". Bestetik, "espetxeetako hormetatik kanpo, aurrera egin nahi dutenei mezua heldu nahi izatea" leporatu die Sevilla IIkoa bezalako borrokaldiak egiten dituzten presoei. Bestalde, horretarako eskaera ofiziala egin arren, hitza hartzea ukatu die alkateak Etxerat elkarteko ordezkariei, "arautegian oinarrituta". Hori bai, Urtzi Paul Larrearen egoera konpontzen ahalegintzeko, "orain arte egindako gestioekin jarraitzeko" borondatea agertu du Landak. Baita Etxeraten ordezkariekin biltzen jarraitzeko ere.
Biltartean, gaur goizaldean ezezagunek Getxoko PPk Areetan duen egoitzara margoa bota izana erabili du Marisa Arruek Bilduren kontra jotzeko. Aipatu gertaerak direla eta, urgentziazko mozioa aurkeztu du Alderdi Popularrak; baita, arautegia baliatuta, eztabaidatzen lehenengoa izaten lortu ere. Arruek PPren egoitzaren kanpoaldean aurkitutako esku-orrietan irakur zitekeen "Sevilla SOS" leloa aipatu du, gertaera Moron de la Frontera herriko espetxeko euskal preso politikoek bizi duten egoeraren inguruan Bilduk aurkeztutako proposamenarekin parekatzeko. "Ez dut ezer txarrik pentsatu nahi, baina ze kasualitatea erasoa Bilduk aurkeztutako mozioa eztabaidatu baino ordu batzuk lehenago, egun berean, gertatu izana. Traza berberak dituzte topatutako esku-orriek eta mozioaren idatziak", adierazi duenez. Koalizio soberanistak "talde politikoen edo pertsonen kontrako inolako erasorik ez" duela "inoiz" bultzatu erantzun dio Maitane Nerekanek bozeramaile popularrari. Bozketara igarota, EAJ, PP eta PSE-EEko zinegotziek bozkatu dute mozioaren alde; baita Bilduko ordezkarietako batek ere. Gainontzeko hautetsi ezkertiarrak, berriz, abstenitu egin dira. Lehen esan bezala, koalizio soberanistak aurkeztutako mozioen txanda heldu denean udal batzar aretoa utzi dute Getxoko PPkoek.
PSE-EEko bi zinegotziek aurka bozkatu arren, Bildu koalizioko lau eledunen bozak nahikoak izan dira Getxoko Udalbatzak Urtzi Paul Larrea getxoztarraren eta Sevilla II espetxeko euskal preso politikoen aldeko mozioa onartzeko, hilabete bat gose greban eta itxialdian bete duten egunean. Izan ere, PPko bederatzi ordezkariek udal batzar aretoa utzi dute, koalizio soberanistak aurkeztutako proposamenak eztabaidatzeko txanda iritsi denean. Irten baino lehen, Alderdi Popularrak Areetan duen egoitzak jasandako "erasoa gaitzetsi ez" izana leporatu die Marisa Arruek Bildukoei, beraien mozioak eztabaidatu nahi ez izatea argudiatzeko. Bitartean, EAJko bederatzi zinegotziak —Koldo Iturbe ez zegoen, osasun arazoengatik— abstenitu egin dira, "horrelako gaiak herriz herri ezean, goian, Eusko Jaurlaritzak onartutako Bake eta Bizikidetza Ponentzian" eztabaidatu behar direla adierazita. Imanol Landa alkateak gaineratutakoaren arabera, erabaki hori hartu dute alderdiaren goragoko estamentuei kontsultatu ostean. Arrasaten, ordea, EAJk eta Bilduk bat egin zuten joan den ostiraleko urgentziazko udal batzarrean, Sevilla IIko preso politikoen aldeko proposamena aurkeztu eta aurrera ateratzeko. Mozioaren onarpena txaloka hartu dute Getxoko udal batzar aretoa bete duten dozenaka gaztek. Argazkian, 145 lagunek eta eragile ugarik egin zuten agerraldia ostiralean Algortan, mozioa babesteko / cc-by Tantaz Tanta Algorta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun