Sevilla II espetxeko euskal preso politikoen senideek azaldu dute osasun arazoengatik utzi dutela baraualdia, ez baitute aurrerapausorik ikusi espetxeko zuzendaritzaren aldetik. Hala ere, nabarmendu dute protestak balio izan duela presoen egoera ezagutarazteko, eta kalera nahiz erakundeetara iritsi dela Sevillako euskal presoen egoeraren kexa.
EPPKk plazaratutako oharra (pdf)
Euskal Preso Politikoen Kolektiboak (EPPK) goizean jakinarazi du hilabete baten ostean Sevilla II espetxean gose greban jarraitzen zuten sei euskal preso politikoek borrokaldia utzi behar izan dutela, osasun arazoak direla eta. Aurretik gauza bera egin behar izan zuten beste hiruk, tartean Urtzi Paul Larrea getxoztarra dela; eta itxialdian jarri ziren. Horiek ere protestaldia utzi dute. EPPKk horren berri eman eta bi ordu berandua, berriz, agerraldia egin dute gatibuen senide eta lagunek Bilbon, eta herritarrei eskatu diete presoen egoera salatzeko lekukoa har dezaten. Besteak beste, larunbat honetan, hilak 30, Bilbon izango den mobilizazioan parte hartzera deitu dute. Hitzordua 17:30ean jarri dute Plaza Eliptikoan. Igandeari dagokionez, Moron de la Fronterako kartzelan dauden herrikideen eskubideak errespatzeko eskatuz manifestazioa egingo dute. Bulebarretik abiatuko da mobilizazioa 12:30ean. Dagoeneko mobilizazio hori debekatzea eskatu du Carlos Urquijo Espainiako Gobernuaren ordezkariak. Bitartean, bihar, azaroko azken ostiralarekin, euskal preso eta iheslari politikoen aldeko elkarretaratzeak izango dira herriz herri. Besteak beste, Algortan, aipatu kontzentrazioa baliatuko dute, Sevilla IIko gatibuen egoera salatzeko. 20:00etan izango da Telletxe plazan. Azkenik, gaur bertan, kartelada egongo da 20:00etan, Algortako Etorbidea eta Telletxe kalearen arteko bidegurutzean. Argazkian, 145 lagunek eta eragile ugarik egin zuten agerraldia ostiralean Algortan, mozioa babesteko / cc-by Tantaz Tanta Algorta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun