Espainiako Auzitegi Nazionaleko Fiskaltzak Iñaki Gonzalo Casal "Kitxu" preso politiko itzubaltzetarra aske uzteko eskatu du. Efe albiste agentziak zabaldu duenez, orain Gonzalo zigortu zuen Auzitegi Nazionaleko Hirugarren Atalari dagokio eskaera horren gainean ebazpen bat ematea. Dena den, aurrekariak ikusita, datozen ordu edo egunotan har dezakete itzubaltzetarra aske uzteko erabakia. Iñaki Gonzalo Casal maiatzaren 4ean kalean egon behar zuen, baina 197/2006 legea edo "Parot doktrina" ezizenez ezaguna dena aplikatu zioten eta Valladolideko espetxean jarraitzen du. Gauzak horrela, Gonzalo Casal edozein momentutan kaleratu dezakete. Gaur, Fiskaltzak beste euskal preso baten askatasuna eskatu du: Jose Arizmendi Aiartzabal. Argazkian, 197/2006 doktrina bertan behera utzi eta Gonzalo Casal askatzeko aldarrikatu zuten urriko Azken Ostiralean, Itzubaltzeta / Romon.
Iñaki Gonzalo Casal "Kitxu" Getxo eta Egin irratietako kazetari izandakoa, 1994ko urriaren 25ean atxilotu zuten Areetako Bizkaiko Zubiko plazan, Andoni Muñoz urduliztarra, eta Algortako Iñigo Otazua "Oti" zein martxoaren 14an zendutako Angel Figueroa algortarrarekin batera. Lanbroa komandoko kideak izatea leporatu zieten lauei, 30 urteko zigorra ezarriz. Egun Valladolideko espetxean, 18 urte eta sei hilabete daramatza preso. Irteera data 2013ko maiatzaren 4rako bazuen ere, zigorra luzatu zioten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun