Jabier Martinezen kasuan, atzo egin zioten harrera Usansolon. Barne Ministerioaren arabera, "etxafuegoak botaz, txaloka eta presoen aldeko pankartak helduz" hartu zuten. Kasu horretan zein beste bostetan aipatutakoak Espainiako Kode Penalaren 578 artikulua urratu eta delitu direla iritzita, Fiskaltzak bi urteko espetxe zigor eskaerak egin ditzakeela aurreratu du Ministerioak, fiskalek txostenak irakurri aurretik.
Francisco Martinez Segurtasunerako Estatu idazkariak gaur azaldu duenez, "ETAko kide bat espetxetik ateratzen den bakoitzean", EAE edo Nafarroako Gobernuaren Ordezkaritzari jakinarazten diote, baliabideak prestatu eta "omenaldiak" ekidin edo, horiek egitekotan, komunikatu ditzaten.
Zuluetaren harrera
Astelehenean Carlos Urquijok salatu zuen "ETAko preso bati omenaldia" egin eta "ongi etorria" eman ziotela. Delegatuak egindako salaketaren arabera, Leioako ekimena 16:30ak eta 16:50ak bitartean burutu zen, "ikurrina asko zeramaten 40 pertsonak" parte hartu zutela. Tokian,"Zuluetaren argazkia eta 'Ongi etorri, Pagoa' leloa zeukan pankartatzarra" zabaldu zuten, baina bertaratutakoek ez zuten kontsignarik oihukatu, bertsio horren arabera. Delegatuaren ustez, Leioako ekitaldiak Terrorismoaren Biktimei Aitorpena eta Erreparazioa Egiteko Legea urratu eta delitua izan liteke. Horren inguruan, Gobernuaren Ordezkaritzatik agindu zuten "zelatan jarraituko" dutela "terroristak goresteko eta biktimak umiliatzeko ekimenak egin ez daitezen". Bestalde, Donostian iganderako antolatuta dagoen Sevilla II espetxeko presoen aldeko manifestazioa ilegalizatzea ere eskatu du gaur Urquijok.
Espainiako Auzitegi Nazionaleko Fiskaltzak esku artean du jada Pagoa Zulueta Vazquez preso irten berriari igandean Leioan egindako harreraren espedientea. "Borroka antiterroristaren iturriek" Europa Press albiste agentziari zabaldu diotenez, Espainiako Barne Ministerioak gaur helarazi dizkio harrera horren inguruan egindako txostenak eta baita beste bost euskal preso politikoei egindakoak ere, tartean Jabier Martinez usansoloarrarena, Fabio Moreno ume erandioztarraren heriotzagatik jarritako zigorra bete zuena. Salatutako beste ekimenak Bilbon (Pacho Martini eta Juan Manuel Piriz Lopezi hartze ekitaldiak), Legazpin (Ignacio Delgado Goñiren etorrera) eta Zornotzan (Jose Legorburu Gerediagari harrera) izan dira, beti iturri berberen arabera. Sei presoak Europako Giza Eskubideen Auzitegiak 197/2006 edo Parot doktrinaren atzeraeragina bertan behera uztearen ondorioz kaleratu zituzten, Espainiak haien espetxe zigorrak ilegalki luzatu zituela. Carlos Urquijok, Espainiako Gobernuak EAEn duen ordezkariak salatu zituen harrerak, Terrorismoaren Biktimei Aitorpena eta Erreparazioa Egiteko Legea urratu eta delitua izan litezkeelakoan. Argazkian, Pagoa Zulueta pasa den igandean, ukabila jasoz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun