Getxon, Leioan eta Erandion ezarri ostean, amaitutzat eman da e-rezetaren hedapena Osakidetzak Uribe izenez ezagutzen duen eskualdean. Bizkaiko ezarpenik handiena da, 134.000 biztanle baino gehiago, 42 farmazia eta 7 osasun-zentro barne hartzen baititu, Eusko Jaurlaritzaren iturriek nabarmendu dutenez. Udalerri horiekin, dagoeneko 800.000 pertsona baino gehiagok, 111 udalerrik eta 299 farmaziak erabiltzen dute errezeta elektronikoa Bizkaian. Sistema berria "segurua, erraza eta eraginkorra" da. Hemendik aurrera, hiru udalerri horietako biztanleek ez dute paperezko errezetarik jasoko beren osasun-zentroetan, baina bai tratamendu-orria, non "modu argian" sendagaiaren izena, dosia eta tratamendua amaitzeko edo berrikusteko eguna ageri diren. Garrantzitsua da gogoratzea sendagaiak farmazian jasotzeko, ezinbestekoa dela osasun-txartela aurkeztea. Izan ere, orain, "errezeta txartelean dago", Iñaki Betolaza Jaurlaritzako Farmaziako zuzendariak esan bezala. "Osasun-arloko langileek eta farmazialariek zein herritarrek harrera ona egin diote errezeta elektronikoari". Horixe adierazi dute gaur goizean Betolazak berak eta Virginia Cortina Bizkaiko Farmazialarien Elkargo Ofizialeko presidenteak. Getxo udalerriak dituen 26 farmazietako bat bisitatu dute, proiektua nola garatu den bertatik bertara ezagutzeko eta balantzea egiteko.
"Normaltasuna" da nagusi preskripzio eta banaketa elektronikoko sistema berria martxan jarri den egun hauetan. Oraindik ere paperezko errezetak ikusten badira ere, Bizkaian 756.000 errezeta elektroniko banatu dira. Horrek esan nahi du errezeten %83 formatu elektronikoan egiten direla jada. Arreta espezializatuan, errezeta elektronikoaren preskripzioa martxan jarrita dago ja Bizkaiko Osasun Mentaleko Sarean, San Eloy ospitalean, eta aurreikusten dute hurrengo hilean Gorlizko eta Galdakao-Usansoloko ospitaleetan ere martxan egongo dela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun