"Uribe Kostan asko gara egunero euskararen aldeko konpromisoa erakusten dugunak, baina oraingoan gure konpromisoa jendaurrean egingo dugu. Bakoitzak bere egoeratik abiatuta, Uribe Kostan euskararen alde zer egiteko prest dagoen zehaztu eta konpromisoa hartzea da gure proposamena. Konpromisoa urte baterako izango da. Zeure buruari galdetu behar diozu: 'Zer egin nezake nik euskararen alde 2014. urtean?'. Konpromisoa bakoitzak bere buruarekin hartuko du", adierazi dute Mankomunitateko arduradunek.
Euskararen aldeko urte beteko konpromisoak hartzera deitu ditu herritarrak Mankomunitateak
Gure hizkuntzaren inguruan egun bateko ekintzatik “egunerokotasunera” jauzi egiteko egitasmoa abiatu du Uribe Kostako Zerbitzu Mankomunitateak; hau da, jendeak urtebeteko konpromiso pertsonal bat hartzea euskararen alde. "Ukn baietz!" kanpainaren bidez, uribekostar guztiengana heldu nahi dute tokiko agintariek. "Zeu ere euskararen aldeko pauso berri honetan partaide izatera animatu nahi zaitugu", azaldu dutenez. Hona hemen konpromiso ereduak: "berbalagun taldean sartuko naiz 2014ean", "ahaleginduko naiz lagunekin euskaraz egiten"; "euskarazko egunkariak irakurriko ditut", "lehen agurra euskaraz egingo dut"… Parte hartzera animatuz gero, bihar, abenduak 3, konpromisoa ondoko helbideetara bidali beharko dute herritarrek: euskera2[abildua]uribekosta.org / euskera4[abildua]uribekosta.org. Konpromisoarekin batera izen-abizenak jarri beharko dira. Euskara Zerbitzuak euskararen aldeko konpromisoa hartu dutenen izen-abizenak argitaratuko ditu, ez ordea hartutako konpromisoa bera. Argazkia: cc-by-sa aiaraldea.com.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun