Lekua baino, lekuak
"Gabrielen lekua" elkarrizketa artistikoa izango da. Zuzeneko musikaz gozatu ahalko da, eta, Rafa Ruedak aurreratu zuenez, baliteke inprobisaziorako tartea ere egotea. "Irudiak sentikariak behar dituen paisaiak sortuko ditu, emozioari begira betiere. Musikak kantagintzara gerturatuko gaitu. Hitza bertso eta olerki moduan egongo da presente, alegia, inprobisazioa, sorkuntza propioa eta Arestiren beraren testuak oholtzaratuz. Eta antzerkiak gorpuztuko ditu kezka guztiak, teatro fisikoaren ildotik, betiere, umorez, ironiaz eta autoironiaz esango nuke", azaldu zuen Guillanek.
Arestiren bizitzan "funtsezkoak" izan diren lekuak ezagutzeko parada ezin hobea izango da. Haren obran "sinbolismo berezia" izan duten lekuek osatuko dute sentikari honen hezurdura. Tartean, Bilbo, Ea, Arantzazu, Baiona eta atzerria. "Sarri aipatzen dugun bezala, oraina ere leku gisa ulertuta, orainean topatu nahi dugulako zein den egun Gabrielen lekua".
"Gabrielen lekua" sentikaria hartuko du gaur Sopelako Kurtzio kultur etxeak, arratsaldeko 7etatik aurrera. Sarrera doakoa da, baina gonbidapena behar da. Saioan zehar, antzerkia, bertsoa, musika eta irudiak nahasiko dira, Gabriel Aresti idazle klasikoa iraganetik gerora eramateko, Andoni Egañak, Oier Guillanek, Rafa Ruedak eta Alain Urrutiak sortutako ekitaldiaren bidez. Halere, Gabriel Aresti kultur elkarteak zabaldu duenez, gaurkoan Amets Arzallusek ordezkatuko du bertsolari zarauztarra. Bizirik egon balitz, Arestik 80 urte bete berri izango zituen orain, pasa den urriaren 14an urtemuga izanik. Gauzak horrela, idazle, poeta, euskaltzain eta itzultzaile bilbotarraren omenezko obra "bereziena eta sonatuena" pasa den urriaren 12an aurkeztu zuten, Bilboko Arriaga antzokian. Izan ere, askotan esan da Bilbo euskararen mapan badago Arestiri esker izan dela. Ordainez, poetaren ondare literarioa zein giza balioak zentzu orokor eta zabalean ezagutarazi nahi dituzte. Egañak aurkezpenean azaldu bezala, "ez genuen nahi Gabriel Aresti geratzea batxilergo testuetan labur eta gainetik ikasten den idazle soil modura". Argazkian, Amets Arzallusek abestuko du gaur Sopelan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun