Diru laguntza lerro berri honekin, zerga bilketan irizpide progresiboak txertatu nahi izan ditugu BILDUtik. Euskal Herri osoan, baina batez ere Getxoren errealitate soziala duten herrietan, oso garrantzitsua deritzogu zerga politika justuago bat ezartzeari, non gehiago daukatenei gehiago ordainarazi eta bildutako dirua egoera sozio-ekonomiko zailagoan dauden banako eta familiak laguntzeko erabiliko den.
Bilduk EAJrekin bultzatutako diru laguntza lerro berri hau, bide horretan pauso bat dela deritzogu. Horregatik, zuen auzoan, familian edo elkartean diru laguntza honen onuradunak izan daitezkeenak informatzera animatzen zaitugu. Edozein zalantza izanez gero edo eskaera egiteko laguntza behar izanez gero, gurekin harremanetan jarri zaitezke 94 466 02 80 telefonoan edo bildu[abildua]getxo.net eta bildugetxo[abildua]gmail.com helbideetan.
Getxoko EH Bildu
Getxon Bilduk proposatuta jarri ziren martxan IBI zerga ordaintzeko diru-laguntzak. 2013ko maiatzean egindako lehen deialdira, non 2012ko IBI zerga ordaintzeko diru-laguntzak ematen ziren, uste baino jende gutxiago hurbildu zenez eta deialdia hobetu eta jende gehiagorenagana heltzeko asmoz, bigarren deialdia jarri da martxan eta 2014ko urtarrilaren 24ra arte zabalik egongo da. Oraingoan 2013ko IBI zerga ordaintzeko diru-laguntzak eskainiko dira eta lehenengoan jaso zutenek eta jende gehiagok eskuratu ahalko ditu diru-laguntzok. Bigarren deialdi honetan, eskatzeko prozedurak errazteaz gain, zaborren eta estolderiaren tasak ere lagunduko dira. Diru-laguntzak hurrengo baldintzak bete dituztenek eskatu ahal izango dituzte: eskaria egiteko momentuan eta 2013ko urtarrilak 1ª baino lehenagotik eskaeran ageri den etxean erroldatuta egotea, ohiko etxebizitzaren jabe izatea, baliabide ekonomiko nahikorik ez izatea, zerga betebeharrak egunean izatea eta beste etxebizitzarik %100an ez izatea. Argazkian, Imanol landa alkatea eta Maitane Nerekan Getxoko Bilduren bozeramailea, Ana Helguera Ogasun zinegotziarekin batera, 2012ko urriaren 31n, 2013ko zergen gaineko hitzarmena iragartzeko prentsaurrekoan / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun