Goizean goizetik elkarretaratzeak eta manifestazioak burutu dira ikastetxe, herri eta hainbat eskualdeetan eta jarraian milaka pertsonak hartu dute parte Bilbon, Donostia eta Gasteizen burutu diren manifestazio jendetsuetan. Grebara deitu duten ELA, CCOO, EILAS, LAB eta UGT sindikatuek, beste behin ere, patronalei eskatu diete Estatuko hitzarmena, "berehala alde batera utz dezatela" eta EAEko hitzarmena "bere osotasunean aplika dezatela". Era berean, hitzarmena berritzeko negoziazioari ekiteko eskatu dute, "inolako murrizketa planteamendurik gabe eta lan-erreformaren aurrean ikastetxe bakoitzean beteko denaren beharrezko bermeekin". Enpresek jarrera hori hartu bitartean "ez digute mobilizazioa beste biderik uzten", azaldu dute ordezkari sindikalek.
Modu berean, Eusko Jaurlaritzari dei egin diote gatazka honetan "duen ardurari" hel diezaiola eta "murrizketa politikak alde batera utz" ditzala, gatazkari konponbidea emango dion irteera aurkitzeko, "langileak sakrifikatu gabe eta hezkuntza sistemari eta lan-baldintzei egonkortasuna emanez". Gauzak horrela, bihar Gasteizen, Lakuatik Eusko Legebiltzarrerako tartea manifestazioan egingo dute irakaskuntzako langileek, goizeko 11:30etik aurrera, "Eusko Jaurlaritzari erantzukizuna eskatzeko eta Legebiltzarrean lantzen ari diren aurrekontuetan murrizketak alde batera utzi eta egoera honi ere irtenbidea emango dion baliabideak kontutan har ditzaten".
"Oso jarraipen zabala" izan du grebak gaur itunpeko irakaskuntzako gizarte ekimeneko ikastetxeetan. Izan ere, ELA, CCOO, EILAS, LAB eta UGT sindikatuek jakinarazi dutenez, milaka langile irten dira kalera lan-baldintza duinak eskatzeko eta EAEko hitzarmena aldarrikatzeko, "inolako murrizketarik gabe" eta "ikastetxe guztietan". Bizkaia, Araba eta Gipuzkoako 250 ikastetxetan baino gehiagotan izan da protesta, bertan 12.000 beharginek lan egiten dutela. Irakasle eta langileek Eusko Jaurlaritzak, Kristau Eskolak eta Irakaskuntza Zentroen Elkarte Autonomoak (IZEA) "inposatzen dituzten murrizketak" salatu eta lan hitzarmena aldarrikatu dute. Lan gatazkak eragin dituen eskualdeko 15 ikastetxeak honakoak dira: Algortako Trinitarias eta Haurtegi haur eskola; Areetako Divina Pastora, Urtiaga kontserbatorioa eta Ibaiondo Lanbide Heziketa zentroa; Berangoko American School of Bilbao, Erandioko Jado-Compasion; Getxoko Nuestra Señora de Europa; Leioako Askartza-Claret, Irlandesas, Mercedarias, Haurkabi haur hezkuntza zentroa, Gaztelueta eta St. George's English School; eta Neguriko Urdaneta. Horietatik zortzi ko () zentroak dira, beste zazpiak Kristau Eskoletan biltzen direla. Grebak bihar jarraituko du. Argazkian, sindikatuek Bilbon egindako agerraldi bat / © ELA sindikatua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun