Aurkeztutako proiektuen artean, kultura eta arte arloko gertaerak daude, dokumentalak, film laburrak, ikastetxeei zuzendutako ekimenak, desgaitasunak dituzten pertsonei zuzendutakoak, euskarazko irakurketa bultzatzekoak, sexu aukeren normalizazioari, kultura artekotasunari, turismoari eta abarri buruzkoak. Proiektuetako batzuek autoenplegua bilatzen dute, beste batzuk, berriz, udalerriko bizitza sozial, kultural eta artistikorako eskaintza altruistak dira.
Atzo itxi zuten behin betiko proiektuak aurkezteko epea eta abenduan zehar erabakiko dute ideia irabazlea edo irabazleak zeintzuk diren.
Krisiaren eraginez edo bestelako arrazoiak direla medio, Getxoko Udal Gazteria Zerbitzuak antolatutako Wanted Ideia Lehiaketaren 2013ko deialdiak orain arteko parte-hartzerik handiena izan du, 21 proiektu aurkeztu direla. Aurreko lau aldietan (2009-2012), ia ehun gaztek sustatutako 29 ideia aurkeztu ziren guztira. Aurtengo deialdian soilik, 21 izan dira aurkeztutako ideiak, 18 eta 30 urte bitarteko 75 lagunenak. Beraz, bere bost urteetan, 50 proiektu batzea lortu du Wanted sariketak. Azaroan, lan-jardunaldi bat antolatu zuten sustatzaileekin, besteak beste, proiektuak birlantzeko eta behin betiko agiri bat aurkezte aldera, elkarri ideiak emateko xedez, besteak beste. Azken agiri hori izango da baloratuko dena, proiektua martxan jartzeko diru-saria eta aholkularitza profesionala irabaziko duten ideia irabazlea edo irabazleak zehazteko. Argazkian, azaroan egindako lan jardunaldia / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun