Areto Nagusian, ordea, 17:30ean "The Basque Diaspora Webscape: Identity, Nation and Homeland. 1990s/2010s" aurkeztuko da. Herenegun San Agustin Kultur Gunean egindako ekitaldi hunkigarrian Argizaiola Saria jaso zuen William Douglassek idatzi du liburu hori, Pedro J. Oiarzabalekin batera. Beste aurkezpen asko egingo dira Areto Nagusian. Horien artean, bi itzulpenen: Alice Munro 2013ko Nobel Saridunaren "Zorion handiegia" eta Virginia Woolfen "Gela bat norberarena". Hain justu, lan horretan oinarritu da Itziar Okariz artista aurtengo Azokaren kartela diseinatzeko.
Ahotseneako eszenatokitik, berriz, Ukan Uribe Kostako taldea, Arrate Mardaras, Xabier Amuriza, Niña Coyote y Chico Tornado, eta beste hainbeste pasako dira. Irudienean, Kameratoia ikusentzunezko rallyaren saribanaketa egingo da (18:00). 24 taldek hartu dute parte edizio honetan, eta 48 ordu eskasetan egindako lanak aurkeztuko dituzte. Gainera, beste hainbeste film luze eta labur eskainiko dira, horien artean "Road to Memphis" dokumentala.
Azkenik, Saguganbaran txotxongiloak, tailerrak eta antzerkia egongo dira, eta Plateruenean, Korrontzik Azokaren azken kontzertua eskainiko du debalde 20:00etan.
Durangoko Azokaren 48. edizioak gaur arratsaldeko 8etan itxiko ditu ateak. Halere, oraindik orain bada ekimen asko euskaraz gozatzeko, Landako erakustazokara bisita egingo duten Koldo Izagirre, Miren Agur Meabe, Toti Martínez de Lezea, Jon Arretxe, Kepa Junkera, Ken Zazpi, Patxi Zabaleta, Zea Mays eta bestelako idazle eta musikari ezagun ugarirekin solastatzeko eta baita euskal produktuak lasaiago ikusi, aukeratu eta erosteko aukera ere. Gauzak horrela, Szenatokia gunean, "Kafie eta Berba" mahai-ingurua egingo dute 17:30ean eta egoera politikoaren eta antzerkiaren arteko harremanak aztertuko dituzte "Ze eragin du egoera soziopolitikoak antzerkiarengan eta alderantziz" izeneko solasaldian. Bertan, Eskoziako Catriona Lexy Campbell Gaelikozko aktore eta idazleak hartuko du parte, eta berarekin batera Euskal Herriko Oier Gillan idazlea, eta Ixabel Etxeberria irakaslea izango dira. Tertuliaren ondotik, Dxusturi Teatroaren "Konpota" bakarrizketa estreinekoz eskainiko du Eneritz Artetxe aktoreak. Eva pertsonaia biblikoaren inguruko antzezlana da. Argazkian, Jose Angel Iribar "San Mames" liburuaren aleak sinatzen pasa den ostiralean / © Txelu Angoitia - Durangoko Azoka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun