Nelson Mandelaren heriotzaren aurrean, EH Bilduk dolumin sentikorrenak adierazi zizkion Hegoafrikako herri eta agintariei, eta bereziki ANC alderdiari eta apartheidaren aurkako mugimenduari, joan den ostiralean plazaratutako prentsa-oharrean. "Apartheiden aurkako borrokak eta sistema bihozgabe horri amaiera emateko bidean Hegoafrikak garatu duen konponbide demokratikoak bere itzala utzi du mundu osoan, baita Euskal Herrian ere", adierazi zuen koalizio soberanistak. EH Bilduk Bizkaian kudeatzen dituen udaletxeetan Hego Afrikako bandera zintzilikatu dute Nelson Mandelaren omenez. Tartean, Sopelan ikusgarri dago oraindik aipatu ikurra. "Agur eta ohore Madiba", zioen amaieran euskal independentisten oharrak. Nelson Mandela Hegoafrikako presidente ohia ostegun gauean hil zen Johannesburg hiriko bere etxean, 95 urte zituela. Argazkian, Hegoafrikako bandera Sopelako udaletxean / © EH Bildu.
Biriketako infekzioa zuen Mandelak, eta sarri izan ditu osasun arazoak, espetxean egin zituen 27 urteen eraginez. Iazko abenduaz geroztik lau aldiz erietxeratu dute, azkena ekainaren 8an. Hamabost egunen ostean larriagotu zen bere egoera. Gauzak horrela, iraila hasieran etxera eraman zuten Mandela. Bertan hil da bart. Hegoafrikako lehenengo presidente demokratikoa izateaz gain, Mandelak Bakearen Nobel saria jaso zuen, Apartheid sistema politiko arrazista gainditu eta komunitate beltza eta zuriaren arteko elkarbizitza sustatzeagatik. Aurretik, apartheidaren aurkako militantea izanik, Afrikako Kongresu Nazionala alderdiko kide egin zen. Horrez gain, alderdiaren beso armatua izango zen Umkhonto we Sizwe (MK) taldeko sortzaile eta buru izan zen. Hainbat sabotaien ostean, 1962an atxilotu eta espetxeratu zuten, 27 urtez. Espetxean zela gaixotu zen, eta azken hilabeteetan asko okertu zen haren osasuna.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun