Gabonak heltzear ditugu aurten ere, eta urtero legez auzokide ugarik hamaika erosketa egingo dituzte data hauetan: opariak, afari edo bazkarietarako jakiak, dekorazio elementuak, eta abar. Egoera horretaz jabetuta, kanpaina abiatzea erabaki du Sopelako Olentzero Batzordeak. Bertan elkartzen dira Udaleko ordezkariak, elkarteetakoak eta auzokideak, eta kezka agertu dute herriko saltokiak indartu behar direlako. Hori dela eta, dei egin diete auzokideei erosketak herriko dendetan egin ditzaten. "Izan ere, herriko dendak herriko osagai garrantzitsuenetakoak dira, ezinbestekoak herriko bizitza sozialerako, herriari bizitza emateko, enplegua sortzeko herrian... Beraz, Gabonak sasoi oso egokia izan daitezke bertan erosteko eta kontsumo arduratsuaren alde egiteko", azaldu du Sopelako Olentzero Batzordeak. "Gainera, herrian mota guztietako produktuak erosteko aukera izango duzu, prezio lehiakorretan eta dendari txikiek eskaintzen duten konfiantzarekin", amaitu dutenez. Argazkian, merkatari eta udal arduradunen arteko batzarra iaz udaletxeko sarreran / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun