Getxoko Udaltzaingoa “Getxoko Sirenoa” izeneko irudiaren desagertzea ikertzen ari da. Algortako Portu Zaharreko moilatik desagertu zen joandako igande goizaldean. Gertaera horren arrazoiak eta aurkitutako lehenengo ebidentziak aztertuta —argazkia zegoen lekuan agertutako pintada bat—, Getxoko Udaleko Gobernu-taldeak "ekintza bandalikotzat" jo du gertatutakoa. “Oraindik ikerketaren ondorioak ez ditugun arren, datu guztiek Kulturaren eta hainbat adierazpen artistiko biltzen zituen ekimen berritzaile baten kontra egindako ekintza bandalikoa izan daitekeela ematen du”, aipatu dute Udaleko iturriek. “Getxoko Sirenoa” Marcos Lopez artista argentinarraren tamaina handiko argazkia da, Getxophoto nazioarteko jaialdiaren barruan hautatu zutena, eta Udalak 2011n denbora batez eskuratu zuena Getxoko bazter esanguratsuenetakora erakartzeko asmoz. Argazkia: © Getxoko Sirenoa.
Udalak bisitariak erakartzeko eta udalerriko ostalaritza establezimenduetan aberastasuna sortzeko kokatu zuen irudi hori. Halaber, adierazpen artistiko berrien aldeko apustutzat jo zuten “sormena, desberdina, gaztea eta aurrerakoia dena” bultzatze aldera, Imanol Landa Getxoko alkateak ekimen horren aurkezpen egunean aipatu zuenez. Udal iturriek horrelako adierazpen artistikoen aldeko apustua berretsi dute eta, beraz, “irudi horrek Portu Zaharreko moilan zeukan lekua berriro bete dezan lan egingo dugu”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun