Ertzaintzak 59 urteko gizonezko bat atxilotu du gaur goizaldean Erandion, agenteei erresistentzia eta desobedientzia delituak egotzita; baita horretarako baimena ez zeukan errebolberra eramatea leporatuta ere. 01:30 inguruan jakinarazi diote Ertzaintzari aipatu udalerriko taberna batean liskarra izaten ari zela. Komunikatzailearen arabera, bezeroei mehatxu egiten zebilen gizon bat. Eusko Jaurlaritzaren Segurtasun Sailak zabaldu duenez, bertara helduta, liskarrean parte hartutakoak identifikatzen saiatu dira ertzainak: horietako bat agenteekin oso erasokor agertu da, identifikatzea saihestu nahian; eta tabernatik alde egiten ere ahalegindu da. Poliziak jotzen ere saiatu omen da. Atxilotzeko, borrokan ibili ostean, 38 kalibreko errebolberra aurkitu diote ertzainek 59 urteko gizonezkoari. Horretarako baimenik ez zeukanez, armak legez kontra edukitzea ere leporatu diote.
Segurtasun Sailaren arabera, aurretik, tabernako bezeroren batekin eztabaidan aritu da atxilotua eta bertatik alde egin du. Ondoren, bueltatu eta mehatxuka hasi zaie bezeroei. Orduan eman diote abisua Ertzaintzari. Polizia iturriek diotenez, lapurretengatik aurrekari ugari ditu atxilotutako lagunak. Komisarian daukate, epailearen aurrera eramateko zain.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun