Halere, Anabel Landarentzat kiroldegia erabat praktikoa da, “erabilera izanez jaiotzen delako”. Gainera, "ondoko herrietan horrelako kantxak alokatzen zituzten auzotarrek” ere onura atera ahal izango diotela uste du Berangoko alkateak. Izan ere, laster Udala berangoztarrengana joko du, jokalekua alokatzeko beharrezkoak diren pausuen berri emateko.
Instalazioek 1.000 metro koadro dute. Tartean bada eskalada-murru txiki bat ere, umeek eskalada praktikatu ahal izateko. Halere, espaziorik nagusiena balio anizdun kantxa da, areto-futbola, saskibaloia edo boleibola praktikatzeko. Moteltze-efektua duen goma malguko kirol lurra dauka, -44x23 metrokoa-, eta 200 pertsona inguruko edukiera duen harmaila. Horretaz gain, lau aldagela talde ditu, bakoitza bere komunekin, eta beste bi banakakoak. Azken horiekepaileek erabili ahal izango dituzte. Gainera, publikoarentzako bi komun eta biltegi bat egongo dira.
Azpiegitura honek Berango Futbol Taldeko zelaiaren sarbidea ahalbidetuko du, zelaiarekin zuzenean lotuta egongo delako. Gainera, kirol instalazioak "gune estrategikoak" batuko ditu, Udal Gobernuaren aburuz, "Iturriaga zelaitik eta Berango-Merana ikastetxetik hurbil dagoelako".
Era berean, Karabiganeko zonalde horretako ingurunea berrantolatuko da, aparkalekua berriztu baita, aurretik zeuden aparkatzeko lekuak mantenduz, Udalak zabaldutakoaren arabera.
Bihar, ostirala, Berangoko Karabiganeko kiroldegia inauguratuko du bertako Udalak. Ekitaldia arratsaldeko 6etan izango da eta bertan, herriko Simon de Otxandategi dantza taldeko kide batek ohorezko aurreskua eskainiko du. Era berean, Berango-Menara ikastetxeko Ikasleen Gurasoen Elkarteak antolatutako eskolaz kanpoko dantza ikastaroko neskek emanaldia egingo dute. Azkenik, Karabiganeko areto-futbol taldeak partida izango du, Derioko Arteagaren aurka. Inaugurazio ekitaldiaren bidez, kiroldegiak aurrerantzean izango duen erabilpena islatu nahi dute. Izan ere, udal iturrien arabera, kirol gune horretan etorkizunean "Karabiganeko areto-futbola partidak eta eskola-kirola topaketak" izango dira. Anabel Landa alkate jeltzalearen ustez, instalazio horiek martxan jartzea "oso garrantzitsua da, hor kirol ekipamenduak batzen direlako eta Iturriaga futbol zelaiari zonalde horretatik sarbide berria emango zaiolako". Kiroldegia bi fasetan egin da. 2010ean, 566.211 euro bideratu zituzten eraikina altxatzeko eta iaz beste 727.942 euro agindu zituzten kiroldegia amaitzeko. Bilduk, bere aldetik, "diru xahuketatzat" eta "makroproiektutzat" jo du kiroldegiaren proiektua eta salatu du horrelako eraikuntzan dirua gastatzea, Berangoko Udalak "arlo sozialean mota guztietako murrizketak egiten dituen bitartean". Argazkian, Karabiganeko lanak pasa den martxoan / © Azkayo.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun