Blue Spirits hasierako izena bidean utzi eta haien buruak The Reverendos lez berbatailatuta, laukotea AEBetako 40 eta 50eko hamarkadetako musikaren inguruan murgildu da 1997an batu zenetik. Sasoi horretako musika beltza, Kaliforniako West Coast bluesa eta T-Bone eta Freddie Kingen musikaren eragina dutela aitortzen dute.
"Let´s Voodoo" abestiak zabaltzen du diskoa, Louisianako zingiretara eramaten gaituena. Akabuko kanta, "The Music will continue until we die"-k, berriz, New Orleanseko soinuak ekartzen ditu. Halere, Memphis, Austin edota Los Angeleseko kaleetako doinuak ere presente dira laukoatearen lan berrian.
Diskoa, haurreko hiruak bezala, musikari denak elkarrekin grabatu dute, gaur egun ohikoena izaten den bakoitza bere aldetik egin ordez. "Ez zaigu gustatzen pistetan grabatzea, reggaetonen antzera", barre egiten dute getxoztarrek. "The cool sounds of The Reverendos" autoekoizpena da, eta AEBetan ere argitaratzeko asmoa dute, Mofungo Records diskoetxearekin. "Jackson hirian disko-denda daukan lagun bat dugu, eta harek lortu du. Ez dakigu zenbat disko saldu dituen, baina...", azaldu dute. Oraingoz, CD formatuan kaleratu dute, baina baliteke biniloan ere ateratea.
"The cool sounds of The Reverendos" laugarren diskoa aurkeztu zuen atzo Bilbon The Reverendos laukoteak. Campos Elisios antzokian egindako ekitaldian azaldu zutenez, laukoteak urtebete eman du kantak atontzen, horretarako Balea Estudioetako Unai Mimenzaren laguntza izan dutela. Lanak hamar abesti batzen ditu eta, lehenengo aldiz, guztiak propioak dira, inoren bertsiorik gabe. Igor Garcia (ahotsa eta pianoa), Alvaro Martinez (gitarra), Victor Martin (kontrabajua) eta Javi Caballero (bateria) taldekideen ustez, "The cool sounds of The Reverendos" da orain arte egin duten "diskorik helduena". Garciaren ustez, disko honekin "profesionaltasunera jauzia" eman dute. Bertan, blues tradizionala eta rock&roll klasikoaren artean murgiltzen dira, baina beti "Reverendosen soinua" manteduz. Datorren urtarrilaren 18an estreinatuko dute diskoa oholtzaren gainean, Durangoko Plateruena kafe antzokian. Dead Bronco talde getxoztarra haiekin arituko da. Urtarrilaren 25ean, ordea, Bilbon aurkeztuko dute, Evidence aretoan. Argazkian, taldea atzo / © The Reverendos.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun