Alimaleko lantaldea
Bertsozale Elkarteak 350 lagun baino gehiago jarriko ditu lanean final egunean dena ongi atera dadin. Langileak ongi identifikatuta egongo dira eta entzuleak lagunduko dituzte, saioa hasieran, bitartean eta amaieran. Bertsozale elkarteko langile eta borondatekoen lantalde prestua da eta momentu oro haien argibideak segitzea eskatzen du antolakuntzak.
Mintzolaren terraza zientifikoa
Azken urteotan munduko gainerako herrialdeetako aditu, ikertzaile eta inprobisatzaileekin harremanak estutzeko ahalegin berezia egiten ari da Mintzola Fundazioa. Lotura horiek indartzeko asmoz, finalean Terraza Zientifikoa antolatu du eta atzerriko ordezkaritza zabala izango da bertan, Euskal Herriko adituekin batera.
Finaleko aldizkaria
Bertsozale Elkarteak eta "Berria" egunkariak aldizkari berezia argitaratu dute gaurko. Bertsozaleak aulkian aurkituko du 24 orrialdetako argitalpena. Finalari buruz jakin beharrekoak, Bertsozale Elkarteari buruzko informazioa eta bertsolaritzarekin lotutako hainbat proiekturen berri bilduko ditu finaleko aldizkariak.
Finala pantaila handian Leioan
Gaurko finalerako sarrera guztiak agortu ziren orain dela hainbat aste. Bertatik bertara finala ikusteko aukera izango ez dutenek zuzenean segitzeko hainbat modu izango dituzte.
Leioan, Ongi Etorri! topalekuak bertso finala pantaila handian eta giro onean zein euskaltzalean ikusteko aukera eskainiko du arratsaldeko 5etatik aurrera. Amu erakargarriak jarri dituzte gainera, pintxoak, txokolatea eta apustuak izango direla, besteak beste.
ETBk Hitzetik Hortzera saioaren emanaldi berezia egingo du eta oso-osorik eskainiko du finala zuzenan. Aitzol Barandiaran, Josu Goikoetxea eta Ilaski Serrano izango dira emaldiko aurkezleak. Bizkaia irratiak, Euskadi Irratiak, Info7 irratiak... ere saio bereziak egingo dituzte.
Horrez gain, Txapelketa osoan egin duen bezala, Bertsoa.com interneteko atariak ere zuzenean eskainiko du finala, www.bertsoa.com webgunean.
Villabonan abiatu zen Bertsolari Txapelketa Nagusia pasa den irailaren 29an, Fredi Paya algortarrak bertako oholtzatik abestu zuela. Hurrengo astean, Algortako Bertsolari Eskolako armadak errefortzuak bidali zituen, Jone Uria kantari jarriz. Gerra luzea izanda, Uribe Kostako udal batek ere ez du gudaldirik hartu. Gure bertsolariek, ordea, bataila batzuk irabazita, azken inguratze-mugimenduan preso hartu zituzten eta ez dira gaur izango Barakaldoko BECeko Bizkaia Arenako eszenatokian zortzi bertsolarik txapelari egingo dioten setioan, milaka lagunen txalo, algara eta malko artean. Hortaz, 13.500 bertsozalek, tartean ehundaka uribekostar, goizeko 11etan hartuko dituzten bertsolariak Aitor Mendiluze, Aitor Sarriegi, Amets Arzallus, Beñat Gaztelumendi, Igor Elortza, Maialen Lujanbio, Sustrai Colina eta Unai Iturriaga izango dira. Arte Ederretako Fakultateko ikasle ohiak dira Iturriaga eta Lujanbio, egungo txapelduna. Arratsaldeko saioa, ordea, 4etan abiatuko da. Egun osoan zehar, bertso festaren berri emango du UKBERRI.NETek, Twitter zerbitzuaren bidez. Argazkia galeriak eta kronika ere eskainiko ditu eguneko azken partean. Arratsaldeko saioa pantaila handian eskainiko du Ongi Etorri! topalekuak. Argazkian, Maialen Lujanbio txapela janzten orain lau urte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun