Finala argazkitan (prozesuan)
Amets Arzallusek irabazi du gaur Barakaldoko BECen jokatu den Bertsolari Txapelketa Nagusiko finala, 1.737,5 puntu batu dituela. Arzallus da txapelketa irabazi duen Ipar Euskal Herriko lehenengo bertsolaria, 1967ko buruz burukoaren ostean "Xalbador" txapelarik gabe utzi zutela. Halere, Fernando Aire Etxartek irabazi izan balu ere, lehenengo bertsolari lapurtarra litzateke gaur nagusitu den Arzallus hendaiarra. 13.500 bertsozalek bete dute aretoa, eta gozamen ederra hartu dute, hainbatetan burrunbaka, olatua eginez, txalo zaparradaz edo zutituz eskertu dietela bertsoak eta egun osoan erabili duten irribarrea zortzi finalistei. Bigarren postua aurreko txapeldunarentzat izan da, Maialen Lujanbiok 1.686,5 puntu pilatuta. Haren ondotik sailaktu dira Igor Elortza (1.164), Aitor Mendiluze (1.155), Aitor Sarriegi (1.106), bere azken finala izan dela aitortu duen Unai Iturriaga eta Beñat Gaztelumendi puntu berdinekin (1099) eta Sustrai Colina (1.082,5). Argazkian, Juanito Dorronsorok jantzi dio txapelak, Maialen Lujanbio eta Sustrai Colinaren begiradapean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun