Gabonetarako haurrentzako antolatutako egitarauaren berri eman du jada Barrikako Udal Kultur Guneak. Hasteko, igande honetan, abenduak 22, "3, 2, zast... egizu jolas!" familiarentzako euskarazko antzerkia izango da Ander Deuna kultur aretoan, Goierrin. Hitzordua 18:00etan izango da, sarrera doan. Antzezlanaren ostean, Olentzerori gutuna idazteko tailerra egongo da. Hain zuzen ere, hilaren 23an izango du jaitsiera ikazkin zaharrak Barrikan. Horrenbestez, aipatu astelehenean, 16:30ean helduko dira Ander Deuna kultur aretora Olentzero eta Mari Domingi. Makilaje tailerra ere izango da ordu horretan. Kalejirari 17:30ean emango diote hasiera Milagros aparkalekuan, antzerki animazioa, euskal dantzak, trikitixa doinuak... lagun. Behin, Iparralde, hondartza / Golfo Norte, Garramune eta frontoia igarota, elizan egingo diote harrera Olentzerori, 19:30 inguruan. Gabonetako antzerkia, txokolatea eta gaztaina erreak ere izango dira bertan. Barrikako Udal Kultur Guneak "kaseroz" jantzita joatera animatu ditu herritarrak. Argazkian, Olentzero eta Mari Domingi eskualdean barrena / © Sopelako Udala.
Bestalde, Barrikan erroldatutako 4 eta 12 urte arteko neska-mutilentzako hainbat jarduera antolatu dituzte. Abenduaren 26an Gabonetako postalak egingo dituzte udal liburutegian, 17:00etatik 19:00etara. Abenduaren 27an, berriz, "Gru, mi villano favorito" filma egongo da ikusgai Ander Deuna aetoan, 18:000etan. Urtarrilaren 2an, berriz, elurretako bola tailerra egingo dute udal liburutegian, 17:00etatik 19:00etara. Eta urtarrilaren 3an "Gru, mi villano favorito" filmaren bigarren zatia proiektatuko dute Ander Deunan, 18:00etan. Informazio gehiagorako edo izena emateko Udal Kultur Gunera (946 675 163 / liburutegia[abildua]barrika.net) jo beharko da abenduaren 21a baino lehen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun