Zehazkiago, mendetasuna prebenitzeko eta autonomia sustatzeko jarduerak antolatuko dira. Horretaz gain, esku-hartzeak gauzatuko dira zaintzen jarraipena bermatzeko eta pertsona bizi izan den ingurunean gera dadin ahalbidetzeko. "Jarduera-protokolo horrek pixkanaka beste kolektibo batzuek egingo dituzten baterako ekintza koordinatuen oinarriak ezarri ditu. Horren guztiaren helburua honako gizatalde hauen premiei hobeto erantzutea da: ezintasunak dituzten osasun mentaleko arazodun pertsonak; babesgabezia egoeran egoteko arriskua duten adingabeak edo portaera-arazoak dituztenak; gizarte-bazterkeria eta babesgabezia egoeran erortzeko arriskua duten pertsonak eta abar", azaldu dute Osakidetzaren iturriek.
Protokoloa aurkezteko ekitaldian tartean sarturiko eragile guztiak bildu dira; Osasun Saila, Osakidetza, Gizarte Zerbitzuak eta eskualdeko 24 udalerriak, eta azpimarratu dute, "erakundeen arteko baterako koordinazio- eta jardun-ekintza horiek sortzeko eta biderkatzeko, sentikortasuna, konpromisoa eta borondate politikoa" behar dela, pertsonen premia soziosanitarioei erantzunak emateko helburuarekin.
Mendekotasun egoeran dauden adinekoak laguntzeko ahaleginak bateratuko dituzte Osakidetzak eta eskualdeko udalek
Osakidetzak Uribe Kosta, Txorierri eta Mungialdea batzen dituen Uribe eskualdeko gizarte zerbitzuek lankidetza soziosanitarioko protokolo bat abiarazi dute EAEko Osasun Sistema Publikoko arduradunekin, mendekotasun egoeran edo egoteko arriskuan dauden pertsona helduei laguntzeko. Baita haien premiei erantzun integrala emateko ere. Horrenbestez, hitzarmenak hartuko dituen 24 udalerrien artean dira Uribe Kostako bederatziak eta Erandio; Getxo, Leioa eta Erandioko udalek zein Uribe Kostako Zerbitzu Mankomunitateak ere izenpetu baitute gaur protokoloa. "Horri esker, urrats bat eman da lehen mailako arreta soziosanitarioaren garapenean, diziplina eta erakunde arteko baterako ekintzak egiteko konpromisoa hartu duten profesional eta eragile guztien ekintza koordinatuaren bitartez", azaldu dute. Hala, "osasunaren profesionalek eta gizarte-langileek orain arte zituzten aldizkako eta larrialdiko harremanak eraldatu" nahi dira, eta haiek "biztanleria-talde bera artatzen duten eragile eta osasun- eta gizarte-erakunde guztien arteko ekintza koordinatu eta sistematiko bilakatu". Zonalde horretako soziosanitarioei erantzuteko, 24 udalerrik eta, gutxi gorabehera, 220.000 biztanlek osaturiko Uribe eskualdeak lehen mailako arretako hamar unitate ditu, horietatik gehienak gurean: Leioa, Erandio, Astrabudua, Sopela, Gorliz, Areeta, Alango (Algorta) eta Bidezabal (Algorta). Eta gizarte zerbitzuetako sei talde, tartean direla Uribe Kosta eta Erandioko tokiko erakunde guztiak. Argazkian, Urdulizko kultur etxean egin dute gaurko agerraldia Osasun Saila, Osakidetza eta tokiko erakundeetako arduradunek / cc-by Irekia.net - Eusko Jaurlaritza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun