Aurtengo Gabonetan ere “Getxopariak” izango dituzte tokiko saltzaile eta ostalariek: bihar, asteartean, hilak 17, 18:30ean, Areetako Paulino Mendibil eta Andres Larrazabal kaleetako elkargunean aurkeztuko diren iratxoak, alegia. Pertsonaia horiek opariak banatuko dituzte, hala nola, zine, antzerki edo musika saioetarako sarrerak..., udalerriko denda edo tabernaren batean getxoztarrak aurkitu eta haiei erosketa-txartela erakusten badiete. Establezimenduek lagunduta Udalak bultzatutako ekimenarekin, merkataritza dinamizatu nahi da Gabonetan, alorrerako funtsezkoa den aldia baita, hori guztia GetxOn kanpaina orokorraren barruan. Imanol Landa alkateak adierazi duenez, “iaz bezala, Gabonetako erosketak udalerriko dendetan egitea bultzatzen saiatzen ari gara. Gure asmoa Getxoko komertzioari laguntzea da, auzokideok bertoko dendetan erostea ahalbidetzea. Pertsonaia hauek Getxoko saltokienganako leialtasuna saritzen dute”. Lehen saria hurbileko denda batean emango du Landak, bihar bertan, Areetan, ekimenaren aurkezpen ekitaldiaren ondoren. Argi-joko berezia izango da aurkezpen saioan, inguruko etxeetako fatxadetan proiektatuko dena, eta horrez gainera, musika eta iratxotxoak ere izango dira bertan. Argazkian, besteak beste, Itziar Epalza zinegotzia, Imanol Landa Getxoko alkatea eta iratxoetako bi iaz / © Getxoko Udala.
“Getxopariek” hainbat ibilbide egingo dituzte Algortako, Itzubaltzeta / Romoko eta Areetako kaleetan barrena Gabonetan. Pertsonaia haiek, iratxoek, errege kabalgatan esango dute agur eta egun horretan azkenengo gozoki irribarretsuak banatuko dituzte. "Une latzak dira eta bizi duguna bizi izanda, saltokiak, hainbat ekimenetan parte hartuz, egiten ari diren ahalegina eskertu" nahi dute Udaletik. “Ahalegina garrantzitsua da. Izan ere, udalerriko ehun bat saltoki Bono Dendara atxiki dira, beren bezeroek dirua aurreztu dezaten gabon erosketak egiterakoan, 99 denda Getxo Enpresaren Gabonetako erakusleiho Txapelketara aurkeztu dira eta beste 9 Bilboko Merkatal Ganbararen lehiaketara. Gabonetako argiek (On, GetxOnekoak), aurten, udalerriko salerosleei eta ostalariei ere kuku egingo diete, kaleak argiekin eta saltokiak biltzen dituen markaren irribarrearekin apainduz”, aipatu du alkateak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun